Despues di un proceso di destaho publico auspicia pa Dienst Openbare Werken (DOW), a scoge e compania cu lo ehecuta e trabounan infrastructural pa revitalisacion di Oranjestad Fase 1. Dia 24 di november 2022 a haci e yamada via prensa local na tur esunnan interesa pa participa den e destaho publico di cual dos compania a reacciona y Arubaanse Wegenbouw Mij N.V. ta esun cu a presenta e miho oferta basa ariba e exigencianan presenta pa Dienst Openbare Werken (DOW).
“Werkbesrpeking” cu e compania lo cuminsa na comienso di januari 2023 pa determina e fecha di comienso di construccion. E termino di duracion di construccion lo dura aproximadamente 50 dia. E prome fase di embeyecemento di e area lo ta specificamente e caminda di Columbusstraat, cu su area di parkeer, crusada di Oostraat y Wilhelminastrat y e caminda di Wilhelminastraat parcialmente. Lo amplia e area pa peaton, lo bini cu mas iluminacion, mas mata y lo percura pa e area tin espacio nan cu por ta uza como terasa y area publico pa sinta.
Ta den cooperacion y comunicacion estrecho cu tur stakeholder pa percura pa e proyecto aki cana segun “schedule” y duna esunnan cu ta uza e area aki menos molester posibel durante ehecucion di e fase di e proyecto aki. Control di calidad y e proceso completo lo ta den man di DOW cu sosten di Ministerio di Asunto Economico, Comunicacion y Sostenibiladad, cual ta encarga cu revitalisacion di Oranjestad.
Cu e prome fase aki, Minister Geoffrey Wever, kier motiva y manda un señal concreto na sector priva cu gobierno di Aruba ta comprometi cu revitalisa nos centro di ciudad.
