Diaranson ultimo a tuma luga e apertura oficial di e Creative Entrepreneurship Workshop na The Hub, San Nicolas. Minister Geoffrey Wever tabata t’ey presente pa asina duna inicio na esaki. Manera ya caba ta conoci cu parti di e vision di Minister Wever ta pa crea un Orange Economy na San Nicolas. E tayernan aki ta parti di e esfuerso pa stimula e localnan cu ta creativo y guia nan pa asina nan por logra habri nan negoshi pariba di brug y asina forma parti di e Orange Economy.
“Mi ta contento di wak un sala yen y tende caba algun ideanan creativo pa cu negoshinan na San Nicolas, Minister Wever a bisa.
Den e prome edicion di e tayer Dave Martinus di Action Coach a duna un splicacion amplio di con e ta pa habri un negoshi pero tambe kico tur esaki ta rekeri.
E programa di Tayernan di Creative Entrepreneurship lo tuma luga over di un periodo di algun siman cu diferente sesionnan.
E proximo fechanan p’e tayernan na The Hub ta: maart 6 y 20 – april 10 y 24 – mei 8 y 22 – juni 5 , 19, 26 – juli 1 y 3.
Minister Wever a termina ta deseando tur participante hopi exito den nan trayectorio empresarial.
