E siman tras di lomba a habri cu preocupacion y critica di dunadonan di cuido riba e hecho cu nan no a ricibi pago di AZV. Minister di Finansa, mr. Xiomara Maduro a splica cu AZV a ricibi 64 miyon menos cu aña pasa debi na e crisis di likidez cu COVID19 tin nos Pais aden, cu ta pone cu nos economia a genera menos na prima di AZV y BAZV. Minister Xiomara Maduro a enfatisa cu ta importante pa tur hende sa cu Gobierno no a keda cu ningun placa di AZV den caha.
Tur locual a colecta via DIMP na prima di AZV y BAZV, a manda pa e organo di ehecucion AZV. Banda di esaki Gobierno a percura pa den luna di juni, juli y augustus pasa mas placa pa AZV, pa asina no keda cu e saldo custumbra habri y na fin di augustus por tabatin e balansa di pago na AZV na cero. Minister Maduro a splica cu AZV a ricibi tambe 20 miyon extra di e fondonan cu Aruba a haya di fiansa di Hulanda. Na inicio di e crisis Gobierno a presupuesta un suma mas halto pa AZV ya cu COVID19 ta trece un crisis di salubridad, pero e fondonan extra aki mester bin di fiansanan local of den exterior.
Minister Maduro a corda cu e crisis di likidez cu COVID19 ta trece cune no ta spaar ningun hende. Nos cuido medico y nos dunandonan di cuido lamentablemente tambe ta afecta, ya cu no tin likidez suficiente pa por cubri tur gasto cu normalmente tin y esunnan cu ta bin acerca. Mester tuma decisionnan dificil pa tur hende pa por keda cu e nivel di cuido necesario y desea. Ta di compronde cu ningun hende kier wordo afecta, pero e realidad ta otro.
Na final Minister Xiomara Maduro a duna su opinion tambe riba e peticion di e grupo di dunadonan di cuido pa Gobierno firma pa caba cu Hulanda pa por haya placa presta. E mandatario a splica cu e ta compronde nan preocupacion y ta pidi espacio y comprension pa e dialogo cu ainda tin cu Hulanda riba esaki, ya cu firma no ta bay brinda ningun garantia cu Aruba lo haya tur e placa necesario pa cubri tur gasto y kita tur dolor di cabes. Minister Maduro a recorda tur hende cu ya caba Hulanda a pone condicion na fiansa pa AZV corta gasto tur luna cu 5 miyon florin y ta premira cu Hulanda lo bin cu mas exigencia pa corta gasto den salubridad locual lo bay sigui afecta e cuido na Aruba.
