Anke pa años kaba e kompania Antilles Aerospace, a base di su sertifikadonan di eksterior, ta gosa di rekenosementu di moda ku su téknikonan na e aeropuertonan di Kòrsou, Boneiru i Aruba por perkurá pa e asina yamá ‘line maintenance’ na e avionnan mas avansá di vários aerolinea di afó, tabata falta ainda e sertifikado lokal. Djaweps atardi Minister Charles Cooper di VVRP a entregá e sertifikado di CCAA (outoridat di aviashon sivil) na gerentenan di e kompania Kurazoleño Antilles Aerospace. Ku esaki e kompania por atkerí mas kliente loke lo por resultá den mas moveshon di avion. Pa basta tempu kaba e kompania ta konta entre su klientela kompanianan di aviashon manera TUI, COPA Airlines, Wingo, Air Canada, Sunwing, Jet Blue, American Airlines, United Airlines i Delta Airlines.Riba potrèt d.r.p.d.: aviation safety inspector airworthiness di CCAA Dévid Eusenia, Minister Cooper di VVRP ku ta entregando e sertifikado na e delegashon di Antilles Aerospace, Eddie Hinds (accountable manager), Cynthia Hinds (managing director) i Arjan Yntema (quality manager), i director of safety & security inspectorate di CCAA Lesley LaPlace.
