Minister di Turismo, Transporte y Labor, mr. Wendrick Cicilia, ta expresa su reconocemento y gradicimento na Ing. Christiaan (Chris) Gerard Dammers pa motibo di su 40 aña den servicio publico. Un trayectoria cu ta refleha conocemento, integridad y un compromiso constante cu e desaroyo di Aruba y su institucionnan.
Pa Minister Wendrick Cicilia, e balor di un carera den servicio publico ta den e contribucion cu un profesional ta laga atras: institucionnan mas fuerte, procesonan mas solido y conocemento cu por transmiti na e siguiente generacion. Den e sentido aki, Dammers su trayectoria ta representa un ehempel di dedicacion na bienestar di nos pais.
“Chris, 40 aña di servicio ta representa un compromiso cu Aruba cu bo a demostra dia pa dia, den diferente funcion y bou diferente responsabilidad. Bo conocemento y experiencia tin un gran balor pa Aruba, pero ta e integridad y seriedad cu bo ta ehecuta bo trabou cu ne, ta duna e trayectoria aki su berdadero significado. Como minister, mi ta aprecia bo conseho y bo disposicion pa sigui contribui. Den nomber di nos ministerio, danki pa bo servicio y pa e ehempel cu bo ta duna na e siguiente generacion,” Minister Cicilia a expresa.
Un trayectoria cu a cuminsa den aviacion
Dammers a cuminsa su carera na Directie di Luchtvaart Aruba na aña 1986, despues di a gradua den Ingenieria Aeronautica na HTS Vliegtuigbouw na Haarlem, Hulanda. Den transcurso di su carera, el a amplia su preparacion cu preparacionnan internacional den aviacion, siguridad, investigacion di accidente, gerencia y legislacion.
Na Directie di Luchtvaart, el a ocupa diferente funcion di responsabilidad den aeronavegabilidad, registracion di avion, inspeccion di siguridad, investigacion di accidente y formulacion di politica. Tambe el a fungi como Director Interino y a contribui na preparacion pa auditorianan di ICAO y FAA, fortaleciendo e sistema di supervision di siguridad di aviacion di Aruba.
Servicio na Aruba den diferente responsabilidad
Entre aña 2009 y aña 2017, Dammers a sirbi como miembro di Parlamento di Aruba, caminda el a ocupa e funcion di Presidente Interino y tabata na cabes di diferente comision parlamentario, entre otro den e areanan di Finansa y Economia, Turismo y Asuntonan di Reino. Tambe el a representa Aruba den PARLATINO y EUROLAT.
For di aña 2017 te aña 2025, el a contribui na e desaroyo di e departamento encarga cu asilo politico na DIMAS. Su trabou a inclui e elaboracion di manualnan, proceduranan y protocolnan pa fortalece un tratamento profesional, uniforme y transparente di peticionnan di proteccion internacional, conforme cu legislacion nacional y convencionnan internacional.
Sigui contribui cu experiencia y vision
Actualmente, Dammers ta sirbi como consehero na Ministerio di Turismo, Transporte y Labor. Den e funcion aki, e ta asesora Minister Cicilia riba aviacion civil, transporte maritimo y aereo, y meteorologia, mientras e ta lidera y coordina varios proyecto strategico di importancia nacional.
Minister Cicilia ta subraya e importancia di reconoce y balora e profesionalnan cu a dedica gran parti di nan bida na servicio publico. Nan experiencia ta un base importante pa sigui mehora e calidad di servicio y prepara e siguiente generacion pa asumi responsabilidad.
Cu e reconocemento aki, Minister Cicilia ta honra Chris Dammers pa 40 aña di contribucion na Aruba, cu aprecio pa su trayectoria y pa e compromiso cu e ta sigui demostra cu futuro di nos pais.
