Minister di Husticia mr. Andin Bikker, hunto cu Procurador General mr. Bote Verstege y Alto Comisario Vanessa Kock a reuni cu representantenan di Asociacion Arubiano di Prensa (ASAP), Mark-Benson Denz, Richard Lacle y Ross Tromp. E reunion tabata pa sigui avansa riba e tema di introduccion di un ‘perskaart’ pa miembronan di Prensa manera ta e caso na Hulanda (‘politieperskaart’).
Den e cuadro aki a elabora riba un concepto cu anteriormente vocero di Cuerpo Policial, Lito Lacle, a presenta na miembronan di Prensa, di cual concepto ASAP por identifica su mes cu ne y a duna algun sugerencia riba e concepto.
Tambe a discuti riba un ‘persrichtlijn’ di cual Ministerio Publico ta trahando riba un concepto. Di banda di ASAP a presenta un proposicion pa considera un programa piloto pa un sistema di comunicacion via un canal di radio special pa media cu ta bin na remarca pa e perskaart.
ASAP ta representa entre otro online media Awe24.com, 24ora.com, SolodiPueblo.com, Masnoticia.com, boletinextra.com, Arubanative.com y algun media imprimi y radial.
E intencion ta pa den 2021 introduci e perskaart, cual Ministerio di Husticia actualmente ta trahando riba dje, hunto cu Ministerio Publico, KPA y ASAP.
