”Tabata un placer pa topa cu algun studiante di Aruba, studiando na University of South Carolina”, asina Minister Plenipotenciario di Aruba na Merca, Joselin Croes, a anuncia diadomingo atardi. “Nos a papia di e impacto di COVID-19 riba nan bida aki na South Carolina y tambe na Aruba”.
E mandatario di Aruba, estableci na e Embahada di Reino Hulandes na Washington DC, a pidi e studiantenan pa keda den contacto via District297 y deseanan hopi exito cu nan estudio.
Minister Croes a topa cu nos studiantenan Laura, Anna Victoria, Nicole, Anna Sofia, Tristan, Gilberto, Caithleen y Keonne.
Tocante Universidad di South Carolina
A funda University of South Carolina na aña 1801. Su prome nomber tabata South Carolina College. Awendia e ta ofrece no menos di 350 programanan di estudio, cu ta conduci na un diploma na nivel bachelor, master of doctoral. E universidad tin 1604 docente y empleado pa atende no menos di 52 mil studiante, cu un total di 35 mil studiante na su campus situa na Columbia, haciend’e den e universidad di mas grandi di South Carolina. E universidad ta conoci pa produci profesionalnan den ramo di maneho di negoshi, ingenieria, ley, medicina, boticario y trahado social.
Ta bon pa corda cu University of South Carolina tin un acuerdo di cooperacion cu Universidad di Aruba desde aña 2011 caba. Na aña 2014 Minister Michelle Hooyboer-Winklaar a firma un acuerdo “state-to-state“ cu a habri e caminda pa universidadnan y “colleges” di estado di South Carolina otorga studiantenan di Aruba “in-state tuition fee“.
Tocante South Carolina
South Carolina ta un estado situa te na e parti zuidoost di Merca den e ultimo skina zuid. E tin frontera cu North Carolina na e parti nort y cu ocean Atlantico na e parti zuidoost y cu Georgia na e parti zuidwest. Su capital ta Columbia mientras cu su ciudad mas grandi ta Charleston. South Carolina ta midi 82.932 km2 cu un populacion di un total di 5.148.714 ciudadano, haciend’e e di 23 estado mas popula di Merca. Tin 133 mil habitante bibando na e capital Columbia, pero e ciudad mas habita, Charleston, tin 136 mil habitante. A nombra South Carolina na honor di Rey Charles I di Inglatera, cu a forma e prome colonia Ingles yama Carolus na Latin pero cu na Ingles nifica Charles.