Durante dia di awe (diaranson) militarnan di Aruba y Corsou, hunto cu Landmacht, como tambe K9 y Cuerpo Policial a tene un VCP (Vehicle Checkpoint) training.
Kico ta un Vehicle Checkpoint
Pa nos compronde bon kico un VCP ta nifica, un VCP kiermen un Vehicle Checkpoint. Den un contexto militar, checkpointnan ta envolve un setup di blokeonan di caminda door di truck of den casonan mas extremo, un vehiculo blinda (manera un tanki) pa por wanta movemento no autorisa of indesea of actividadnan militar y pa check riba identificacion valido y listra riba contrabanda, fugitivo of arma, droga, cu no ta permiti den mannan civil.
Teniente Mike Lichtvoet ta un troepcommander na Marinierskazerne na Savaneta y el a splica cu loke nan a haci den e area di warda di Balashi ta para algun auto y tene control riba por ehempel droga, municion, documentonan necesario, pa control. Esaki ta pa claridad un entrenamento pa defensa. Cu e entrenamento aki, ministerio di Defensa ta pone militarnan disponibel pa asina duna un man pa mantene ordo y siguridad, na momento cu pidi pa esey.
Tabata tin total 3 peloton, di cual e prome a participa den oranan di mainta, consistiendo di 35 militar. Merdia tabata tin un peloton di 42 militar y pa parti atardi un otro peloton di 35, haciendo esaki riba 112 militar. Tur tres peloton ta consisti di militarnan di Aruba y Corsou, naturalmente asisti pa Landmacht, K9 y Cuerpo Policial.
Dialuna ultimo e militarnan di Corsou y landmacht a yega Aruba y a cuminsa cu entrenamento diamars, diaranson a sigui y ainda diahuebs tin entrenamento. E entrenamento lo bay continua te cu diahuebs mainta, segun Lichtvoet.
Pa loke ta Corsou, teniente William Plaate a splica cu ya caba nan ta draai riba 4 aña cu e VCP hunto cu Cuerpo Policial di Corsou. Esaki tabata un oportunidad hunto pa hunto cu e militarnan Arubano, Landmacht, K9 y Polis por train y tambe mustra nan con nan ta haci’e na Corsou, pa asina tambe por haci un comparacion y pa futuro con nan por coopera cu e ayudo di esnan na Corsou y por aplica esaki tambe na Aruba.
Satisfecho
Mariniernan di Corsou ta sumamente satisfecho cu e resultado di awe. E ta algo apart cu por traha hunto cu cinco unidad y cada uno tin su propio conocemento y experiencia. Segun Plaate, hunto por siña di otro. E siguiente biaha lo ta mas facil pa e proximo entrenamentonan, el a finalisa.
