Cu instalacion di mas of menos un 4000 panelnan solar, den corto tempo, Marinierskazerne na Aruba, kier ta “energieneutraal” y pa mustra como ehempel pa e isla y e resto di mundo.
E cara riba e plan aki ta comandante Timon van Dishoeck. El a laga su mes inspira door di e ambicion di e gobierno anterior pa converti Aruba den un isla completamente sostenibel pa aña 2020, segun un articulo riba NTR/Caribisch Netwerk.
“For di un punto di bista militar: si mi bay haci menos uso di combustibelnan fosil y por genera mi propio energia, mi no ta depende di otro y mi lo ta menos vulnerabel. Si coriente cay por ehempel debi na un horcan manera a pasa na St. Maarten, mi no ta depende riba generator ni di un hende cu tin cu suministrami combustibel.”
E 4000 panelnan solar mester genera 1,2 megawatt, e comandante a splica, cu ta suficiente pa e consumo di energia di e kazerne. E inversion ta 1.5 miyon Euro y dentro di tres aña e lo wordo gana bek. “E placa pa neuteralisa energia, a wordo priminti pa e minister Hulandes. Asina ta mi ta considera cu e 1.5 miyon euro ta garantisa.”
Spaar for di awo caba
E kazerne na Savaneta ta paga anualmente masha hopi na recibonan di coriente. Pa por scapa di esaki Van Dishoeck a cuminsa ya caba el a cuminsa na reduci e consumo di energia. Tur e airconan awo ta conecta na un sistema cu ta determina e temperatura minimo di 23 grado. “Cu esey, ya nos a spaar 30 porciento riba nos recibo di coriente.”
Van Dishoeck ta invirtiendo e placa gespaar na e momento aki den e mehoracion di e area di relahacion canto di awa. Den futuro, e kier debolbe e placa gana na un aldea di practica (oefendorp) unda cu nan ta imita e batayanan den cas y riba caya.
E comandante a sigui bisa: “Mi kier comparti tur mi conocemento riba energia neutral. Pa loke ta ami, mi ta habri e kazerne pa e alumnonan di scol bin core stage of despues di nan estudio por yuda den e direccion aki, cu e panelnan solar y mantenimento.
