Lider di AVP Mike Eman ta hopi entusiasmo cu e reaccion cu su partido ta ricibiendo pa entrega di su lista diabierna atardi. E fecha riba cual partidonan ta entrega lista semper ta un forma unda cu nan ta demostra e apoyo grandi di simpatisantenan cu nan tin pa e eleccion benidero. Niun hende por lubida hamas e ola berde grandi cu a pasa den Vondellaan yega te Havana unda entrega di lista tabata na 2013. Den 2017 e ola berde ta sali for di veld di cricket den Vondellaan.
Partido AVP ta invita su simpatisantenan pa cuminsa yega veld di cricket (banda di Banco di Caribe) for di 12’or di merdia. Aki e preparacionnan ta cuminsa pa e caminata direccion Censo. Mientras cu ta spera e salida, ta bay tin un tremendo ambiente riba tereno di cricket cu animacion musical y lunch pa tur presente.
Mescos cu na 2013 ta bay tin un trailer grandi unda candidatonan lo dirigi nan mes na e publico presente prome cu e salida. Candidatonan lo yega den grupo for di San Nicolas, Savaneta, Pos Chiquito, Santa Cruz, Piedra Plat, Paradera, Tanki Leendert, Noord, Madiki y Dakota, pa hunto forma e lama berde riba e ruta pa Censo. “Miles di persona lo marcha hunto cu nos candidatonan pa entrega e lista na Censo cu lo planta e victoria dia 22 di september awor. Nos lo forma e caravana berde di mas grandi cu Aruba a yega di mira. Uni cu nos pa e ekipo aki por goberna pa 4 aña mas hunto cu e generacion nobo. Ban Uni pa Aruba por sigui padilanti,” ta e mensahe cu lider di AVP ta manda pa e pueblo di Aruba.
