Aruba ta conoci pa su nightlife, sea ta den hotel, nightclub of evento. Na hotel tin e banda Sunrise cu ta entretene e turistanan cu diferente musica. Den Sunrise Band tin Mighty Talent Jr., kende tin tres aña sin participa den Caiso y Soca. Cu si e ta participa den Carnaval 70, Mighty Talent Jr. no a confirma esey.
Shaun Phillips, miho conoci como Mighty Talent Jr., a expresa cu e ta disfruta tur dia y anochi di musica. E ta toca diferente tipo di musica. El a conta cu cinco biaha el a bira rey di Calypso, pero a tuma un distancia di carnaval. Otro aña ta Carnaval 70 y Philips no a indica si e ta bay participa of no den Caiso y Soca.
Loke e kier mira cambio pa e competencia di Caiso y Soca, ta mas publico, mas participacion di mucha y hende grandi. El a ripara cu tin menos participante y e ta compronde cu tempo ta hunga un rol grandi. P’esey e ta enfatisa di kier mira mas participacion y cu e publico yega pa apoya nan cantante of banda faborito. E kier mira mas hende aporta na carnaval.
Maiah Romero ta un cantante internacional y ta na Aruba. El a conta di toca cu e banda ta increibel y esaki ta un oportunidad pa por toca aki na Aruba. Pa loke ta Sunrise band, segun Romero, cu nan ta basta nobo pasobra nan tin dos luna forma. Nan ta canta diferente musica entre otro pop, rock, merengue, jazz, loke e publico pidi.
