KOR ta un areglo hopi importante pa tur e comerciantenan chikito cu tin un empresa propio y pa nan por sa tambe kico nan por spera den e proximo siman y proximo dianan.
E areglo pa comerciante chikito ta unicamente pa esunnan cu tin un empresa propio. Segun vocero di Departamento di Impuesto, Meverly Romano a indica cu pa 2021 tin un total di 2766 Eenmanszaak registra cu a pidi tambe pa e areglo pa comerciante chikito (KOR=Kleine ondernemings regeling).
Den 2019, KOR a cuminsa. E tempo ey tabatin 75 aplicante y den 2020 el a aumenta na 98. Den 2021 tin 2766 comerciante chikito, cu ta haci uzo di e areglo aki, cual ta un areglo hopi beneficioso, debi cu KOR ta duna e comerciante chikito e espacio cu e no tin mester di entrega su declaracion di BBO tur luna, pero tampoco e no mester di haci pago di BBO tur luna.
Tin un grupo di comerciante chikito cu na aña 2019 y 2020 a cay den un incumplimento. Segun Romano, awo recien e comerciantenan aki ta hayando un cobransa adicional, yama un ‘naheffingsaanslag, cual ta pa 2019 y 2020.
E ta agrega cu pa 2019 y 2020, KOR tabata valido pa tur cu tin un empresa cu no ta genera un ganashi of volumen di benta (omzet) mas hopi cu 12 mil florin pa aña. E empresanan chikito aki cu a surpasa 12 mil durante aña, cual ta un desaroyo hopi bon, no ta bin na remarca mas pa KOR. Pa e añanan ey, e drempel tabata 12 mil. Esunnan cu a surpasa e 12 mil, e ora nan lo haya un cobransa adicional, unda cu ta cobra nan riba e diferencia cu nan a surpasa.
Pa un cobertura mas amplio lesa e edicion di TREMPAN di mañan.
