Sindicato di Polis Arubano (SPA) ta preparando p’e proximo reunion cu mando policial fiha pa dia 17 di augustus. Durante e encuentro aki, puntonan crucial manera bulletproof vest, scarsedad di personal, y e urgencia di organisa opleidingnan interno lo ta poni riba mesa. Presidente di SPA, Lito Lacle, a destaca cu e meta principal ta pa cumpli cu e korpsmededeling 1331 di 2024, garantisando continuidad den e liderazgo policial.
E legislacion di politieopleidingen ta stipula cu un agente ta cuminsa cu un estudio MBO y por continua su carera profesional a traves di e MKO Opleiding pa hoofdagent, KO Opleiding pa onderinspecteur, y HKO Opleiding pa inspecteur. SPA a pone presion caba, logrando cu mando policial a anuncia cu e opleiding pa inspecteur lo habri na februari. E preparacion aki ta di vital importancia, ya cu den e proximo cinco añanan e cuerpo lo perde 32 colega pa pensioen, incluyendo tur coordinador di recherche. Sin un plan proactivo, e posicionnan clave aki por keda vacante.
Pa preveni esaki, e sindicato ta insisti riba organisando e Kader Opleiding p’e rango di onderinspecteur y otro estudio oficial reconoci den e cinco trayectonan di carera policial. Lacle a enfatisa cu cursonan externo no ta conta pa crecemento interno, p’esey ta esencial pa organisa e opleidingnan aki mas pronto posibel. SPA ta confia cu mando policial lo comparti e mesun vision pa fortalece e futuro di e trahadonan.
Pa mas, lesa TREMPAN.
