Diahuebs miembronan di Parlamentoa a reuni cu minister di Husticia pa haya informacion riba e pasonan cu ta tumando den cuadro di entrada di ileganan na nos isla.
Parlamentario di POR, Alan Howell durante su disertacion a mustra cu trabounan duro y exitoso ta tumando lugar riba tera, pero na mes momento a mustra su preocupacion pa loke ta trata loke ta sosodiendo riba lama.
“Pa loke ta trata siguridad di nos isla, nos ta score gol, pero ta sinti hopi falta den e parti di defensa. E parti aki kisas no ta cay bou Warda Nos Costa directamente. E defensa ta cay hopi mas biaha na e momentonan aki riba lama y ta eynan nos mester concentra”.
Howell ta bisa cu resultadonan positivo por wordo mira riba tera, cifranan ta demostra esaki y no tin duda cu e resultado aki lo continua mirando e team cu ta encarga cu e parti aki.
Pero di otro banda, preocupacion di pueblo ta e parti di lama, con ta bay drumi anochi y ta sigur cu e parti di frontera aki ta cera. Alan Howell ta indica cu si no logra cera nos costanan, e bon trabou cu Warda Nos Costabou guia di Sra. Trudy Hassell ta haci no lo ta bale la pena. “Nos por gaba awe cu nos tin 1856 hende cu nos a manda bek, pero e pregunta grandi ta cuanto a drenta y cuanto a keda sin bay bek?”
Pesey durante e reunion den Parlamento el a puntra minister di Husticia si tin un calculacion di cuanto boto lo ta sali di pazuid y yega Aruba y cuanto di nan ta wordo detecta? Tambe el a puntra e minister con e comunicacion cu Venezuela ta riba nivel di Husticia mirando cu mester hala orea di nos bisiña ya cu for di eynan nan ta sali. Ta importante pa Aruba manda e mensahe cla cu nos no ta contento cu e hendenan ta saliendo for di eynan y ta dunando nos dolor di cabes akinan.
Den mesun cuadro Howell tambe kier sa si gobierno ta mandando e mensahe na nos bisiñanan cu akinan no ta bay tin wega, cu si nan yega akinan nan no lo bay wordo trata netjes, pasobra ‘no hay cama pa tanta gente’. Si e mensahe aki yega na e hendenan, e ora lo por haya menos hende ta purba drenta, pasobra tin e impresion cu ta facil pa drenta Aruba. Mester cera nos froteranan riba lama y no laga e hendenan aki yega tera. Di e forma aki ta evita cu nos cuerponan di siguridad mester bay dedica nan mes na atende cu ilegalnan en bes di concentra riba combatimento di criminalidad y mantencion di orden. Pa tal motibo e parlamentario di POR, Alan Howell, na final a puntra minister di Husticia si lo por bin cu mas hende pa traha cu Warda Nos Costa y tin un team special cu lo traha 24 ora 7 dia pa siman riba lama. “Pueblo kier wak accion y actualmente e accion cu pueblo ta wak ta riba tera y falta accion riba lama”.
