Awe dia 15 di mei rond mundo ta celebra Dia di Famia. Parlamentario Mervin Wyatt-Ras ta expresa palabra di aprecio na tur famia aki na Aruba. Na aña 1993 e dia aki a declara door di Nacionnan Uni como un dia internacional di celebracion y refleho riba e importancia di famia. E tema di e an1a aki ta “famianan y urbanisacion” pa concientisa e importancia di maneho sostenibel y family friendly cu ta relata na SDG’s y metanan manera SDG 1 pa elimina pobresa, SDG 3 pa bon salud y bienestar general, SDG 11 pa haci comunidad inclusivo, cu siguridad, resiliente y sostenibel y SDG 10 pa reduci desigualdad dentro y entre paisnan.
Segun Wyatt-Ras nos comunidad ta consisti di famianan solido. Nos ta convivi un cu otro y a pesar di e cambionan den constelacion familiar y individualisacion, nos famianan a sa di comparti y yuda otro specialmente durante e tempo dificil di COVID. Pa motibo di perdida di empleo di mayornan den famia y retonan financiero, por constata aumento di problema laboral, di pareha, violencia, abuso, maltrato, depresion, adiccion tambe criminalidad.
Nos hendenan tin mester sosten pa por sali for di debe y pa cumpli cu primera necesidad. Lamentablemente por constata cu na Aruba a pesar di miyones di florin cu Staten a aproba, gobierno no a logra yuda esunnan den necesidad lo suficiente. Ta experencia cu pobresa a aumenta mas y cu e medidanan cu gobierno lo introduci y cu lo ser sosteni dor di RAft y COHO lo aumenta dicho pobresa y trece mas desigualdad den nos comunidad. E poder di compra di nos ciudadanonan lo baha mas cu introduccion di BTW y door di e reforma laboral door di cual lo por kita trahado mas facil. Door di e medidanan den cuido saliendo for di e landspakketten y reforsa dor di RAft y COHO, nos ciudadanonan lo haya menos medicina y lo mester bay paga pa tur tipo di servicio medico locual lo trece cu ne mas division entre ciudadanonan y cuido di clase (klassezorg). E desigualdad entre nos pais y specialmente madre patria lo bira mas grandi ainda en bista di e Rijkswetten RAft y COHO cu lo haci cu nos pais cu semper a para riba propio pia lo bira dependiente di gobierno y Parlamento Hulandes, sin cu nos Parlamento y gobierno lo por eherce nan trabou debidamente.
Den caso no ta di acuerdo cu algo mester bay te Hulanda. Pues e metanan di SDG’s indica door di Nacionnan Uni lo no ta alacansabel pa Aruba. Mas y mas e metanan aki lo bira dificil pa logra.Esaki sigur lo tin mas impacto riba e situacion financiero di nos famianan y lo trece cu ne mas inseguridad familiar, stress y descontento, cualnan lo tin impacto riba nos futuro generacion. Ta urgente cu nos pais por pone mas atencion riba nos famianan y nan bienestar prome cu tuma cualkier decision. Esaki ta un preocupacion grandi pa Wyatt-Ras y partido AVP. Manera tur otro pais den mundo nos tin cu orienta nos mes ariba bienestar di henter comunidad. Riba e dia aki pues tin cu realisa cu nos tin un bataya pa hiba pa por garantisa bienestar, salud y futuro di nos famia.
