Parlamentario drs. Mervin Wyatt-Ras awe ta orguyoso y contento cu e plannan di IMSAN ta bira realidad. Wyatt-Ras den su trabou anterior como presidente di e comision di salud y di asuntonan social na varios occasion a reuni cu e director y diferente actor riba tereno di salubridad y a keda trece padilante cu ta necesario cuido y tratamento pa loke ta trata e malesa cancer.
Un cantidad di pacient mas di 200 ta ser manda anualmente dor di AZV pa haya tratamento den exterior. Esaki tin como consecuencia cu e pacient si e tin yiu ta laga nan atras, su famia tambe y ta perde dia di trabou. Dor cu e tratamento ta dura un par di siman e pacient mes ta sintie tristo leu di su famia locual no ta beneficioso tampoco pa e proceso di curacion. Ademas e tratamento ta costa sumanan grandi di florin. Dor di un centro oncologico na Aruba lo baha gasto y lo haci cu e proceso di curacion lo ta uno di nivel mas cualitativo pa e pacient cu lo ta serca di su famia.
Baptist Health sigur lo garantisa e nivel halto di cuido y tratamento y nos specialistanan tambe lo tin oportunidad pa por haya experencia den exterior. Durante IPKO a discuti na varios occasion tocante cuido specifico riba tereno di oncologia. Alavez gobierno di Aruba, den e caso aki minister Alex Schwengle a organisa e asina yama “Healthcare conference” riba tereno di salubridad cu sigur a fortifica e cooperacion entre e diferente actornan.
Lo bai construi un bunker y lo tin costonan di alrededor di 61 miyon. Tin un bidding pa e diferente companianan cu por traha na e proyecto.
Wyatt-Ras ta desea e director, personal y tur cu ta envolvi hopi exito cu e trabounan y ta spera cu pronto nos por conta cu e centro aki lo por mira su apertura. Wyatt-Ras ta kere cu ora e centro aki ta finalisa lo por introduci turismo medico na Aruba. Asina pacientnan di e islanan rond di nos y pacientnan cu no por yega Merca por ser trata na e centro aki. Wyatt-Ras a entrega un mocion al respecto durante di reunion publico encuanto presupuesto 2018.
