Parlamentario drs. Mervin den un programa radial, a dirigi su mes na nos pueblo, el a trece padilanti cu e gobierno disfuncional aki mester bandona Cocolishi. Segun Wyatt-Ras en bes di stimula y inverti den nos pueblo gobierno ta blo keda hinca man den cartera di nos ciudadanonan, empobreciendo nos pueblo dia pa dia. Esaki mientras nepotismo ta na ordo di dia den nos pais, den cual tur dia amigo, famia y conocinan ta keda nombra den tur tipo di posicion y fraude den diferente departamento manera na DVG y na Arubahuis. E gobierno aki ta haci comosifuera integridad ta nan prioridad y cu hasta a lanta un ministerio special pa garantisa integridad, pero no ta haci nada pa cumpli cu loke a priminti pueblo.
Wyatt-Ras a trece padilanti cu recientemente un cantidad di ciudadano malcontento a acudi na cas di partido di AVP pa mustra nan inkietud, nan malcontento y nan preocupacion pa e situacion den nos pais. E poder di compra di nos cuidadanonan ta bahando dia pa dia, tin nepotismo, fraude ta na ordo di dia y e gobierno aki tin un asina yama “wanbeleid”.
A entrega un carta dia 24 di augustus na VNO, firma door di fraccion di AVP hunto cu e fraccionnan den oposicion MAS y Accion 21 pa gobierno Hulandes por atende cu e “wanbeleid” aki.
CAft recientemente a manda un conseho pa un aanwijzing pa gobierno di Aruba cu a trata den Rijksministerraad diabierna ultimo dia 26 di augustus. Evelyn Wever-Croes ta haci comosifuera cu esey no ta nada, sinembargo e conseho di CAft ta mustra cu Hulanda a fada di e gañamento y konkelmento di e gobierno aki. A start e procedura di un aanwijzing y segun CAft gobierno no a cumpli cu 13 punto cu nan a acorda cu Gobierno Hulandes.
Manera cu esunnan den gobierno mes a yega di grita den Parlamento, si bo pone ken cu ta pa goberna bo ta haya kico cu ta y con cu ta.
Por menciona alabes cu recientemente despues cu durante e lunanan tabata papiando di introduccion di BTW door di e minister di Finanzas awo diripiente e minister aki ta bay sconde pa e minister presidente bin anuncia cu en bes di BTW lo hisa BBO cu 1.5 %. Gremio comercial y sindicato (19) a uni y a expresa nan malcontento cu e situacion aki. Aumento di BBO lo tin consecuencia grandi pa inflacion y lo baha e poder di compra di nos ciudadanonan mas ainda. Door cu gobierno ta gaña, continuamente e inversionnan a baha y prijsnan ta keda subi, door cu e comerciantenan ta insigur di e situacion economico.
Evelyn Wever-Croes a firma e landspakket cu Hulanda gañado Hulanda cu e lo bin Aruba y ehecuta loke el a firma. El a corta 60 miyon den cuido di salud, perhudicando dokter di cas, dentista, specialista y otro trahado di cuido door di cual hopi di nan ta malcontento y hasta tin ta bandonando nos pais.
Den un rapport recien di HAVA por tuma nota cu tin 6 dokter di cas cu a bandona nos pais y 5 a bay cu pensioen door di cual tin escasez di dokter di cas. Dokter di cas ta bandonando nos pais pasobra nan no tin e entrada mas cu nan tabatin y door cu e presion di trabou a subi, en bista cu tin menos dokter pa e cantidad di pashent cu tin. E cantidad di pashent pa cada praktijk a subi di 1864 na 2020 pa 2029 na aña 2022. Tambe tin escasez di asistente di dokter cu educacion mas halto. E cortamento di 60 miyon den cuido a afecta e practicanan di dokter masha hopi y lo baha e calidad di cuido.
E critica riba gobierno ta cu no ta ehecuta otro forma di baha gasto den cuido, manera cooperacion entre e entidadnan, compra di medicina hunto y mas barata y baha e gastonan di tratamento den exterior manera Colombia door di miho preparacion di e pashent y contract.
E gobierno aki kier introduci un eigenbijdrage pero na un forma iresponsabel cu lo a trece “klassezorg” cu ne y ora stakeholders a mustra nan preocupacion y fraccion di AVP a vocifera e critica riba e proceder aki a cambia tal decision. Pa loke ta trata e lista positivo cu a introduci na april 2017 a cambia tal decision na augustus 2017 y awor ta menasa atrobe di bai introduci esaki na october 2022. Ainda sin bin cu ningun sosten di
E ministernan di e gobierno aki, no ta scucha pueblo sino ta ehecuta y ora nan wak cu algo ta bay robes ta cambia nan decision. Pues un gobierno cu no tin direccion, ni ta traha segun meta y principio di integridad.
E gobierno aki tampoco no tin fin pa evalua e crisisplan y a haci yen di malpractica cu FASE locual a resulta claramente for di e rapport di ARA cu recientemente a keda trata den reunion publico den Parlamento. Ni papia mes di e contract spoorloos di Eagle LNG cu cual gobierno a firma un contract, comprometiendo nos pais pa 20 aña sin bista riba beneficio pa nos pais.
Tampoco gobierno no ta inverti den proyecto bisto. A critica AVP di mega debe pero tur hende por mira unda e placa cu AVP gasta a bay. A drecha scolnan, a inicia cu renovacion y ampliacion di hospital, a construi Green Corridor/Watty Vos Boulevard, a construi MFA na diferente bario, a muda waf, a coloca panel solar na edificio di gobierno, scolnan pa genera energia alternativo, a inverti den nos hendenan y pa crea miho condicion di trabou, a mehora e fondo di pensioen y di SVB, introduci reparatietoeslag pa haci posibel cu esunnan cu tin menos cu salario minimo por sobrevivi, a hisa bijstand na diferente ocasion, a introduci un schoolkinderentoeslag pa nos muchanan por cumpra nan material pa scol, a bin cu korting riba pago di studielening, a pasa ley di creche, ley pa proteha nos grandinan y ley di cuido di salud y di BIG. Tambe a introduci Traimerdia pa yuda e mayornan cu ta traha cu cuido di nan yiu y a introduci e proyecto di sociale vorming pa duna e hobennan un SEGUNDA oportunidad.
Contrario na AVP, e gobierno aki te ainda no a entama proyecto pa yuda nos hendenan, sino solamente kier hinca man den cartera di nos hendenan pa medio di diferente medida, mientras no ta corta den propio gasto. Por menciona cu den rapport di CAft ta menciona cu e gastonan di goederen en diensten a aumenta cu 33 miyon florin na 2022 y cu e suma di inhuur van derden of esunnan externo pa haci trabounan a crece fuertemente. Ademas huur di edificio tambe a crece cu 40%.
Gobierno pues ta keda cumpra auto caro di 150.000, gasta hopi na fiesta y na nombra compinchinan en bes di mira e interes di nos hendenan cu mester. P’esey mas y mas por nota esnan di e mesun signatura di e gobierno actual den coalicion ta uni nan mes cu AVP den e lucha pa sali na interes di esnan cu tin mas mester. A bira tempo pa e gobierno aki bandona Cocolishi rumbo pa cas.
A bira tempo pa AVP haya e oportunidad pa goberna cu e meta di realisa, manera lider di partido Mike Eman a trece padilanti, un bon comun, esta cu interes general mester ta na promer luga y conhuntamente y solidario cu otro mester logra meta di interes comun pa nos ciudadanonan.
