Ta despues di un luna y dies dia cu a firma acuerdo di intencion pa traha hunto, cu e dos partidonan politico MEP y RAIZ, cu despues di eleccion parlamentario a logra hunto cera diesun asiento, ta cla pa formalisa e union aki den forma di un acuerdo di gobernacion. Cu esaki, partidonan ta mas cerca di forma e proximo gobierno, Gabinete Wever-Croes II.
E partidonan a yega na otro dia 8 di juli ultimo na California Lighthouse y a firma un acuerdo di intencion pa bay traha cu otro y forma e proximo gobierno. Awo, lo firma e acuerdo di gobernacion entre e dos partidonan mañan atardi na Nicolas Store den centro di San Nicolas. Formado a bisa cu a scoge Californa Lighthouse pa firma e acuerdo di intencion pasobra e faro ta un simbolo di integridad.
E biaha aki lo firma na San Nicolas como un simbolo di e districto cu sin duda lo saca Aruba for di e retonan financiero economico cu nos tin. E mandatario ta convenci cu e desaroyo economico cu nos mester, lo bini den San Nicolas, probablemente riba tereno di refineria. No ta mencionando ki desaroyo, pero ta conoci cu tin por lo menos dos compania cu tin algun tempo caba ta purbando pa haya financiamento pa por bin cu un proyecto riba e tereno di refineria. Pero como cu ainda nan no tin fin di yega na fondo door di fiansa, ainda e proyectonan aki no tin fin di concretisa.
E acuerdo di gobernacion lo encera e plannan y visionnan di ambos partido politico, pero mescla den un solo documento, den cual ta acorda riba liñanan grandi, kico lo ta e maneho p’e proximo cuater añanan nos dilanti. Durante un entrevista cu 24ora.com, formado Evelyn Wever-Croes a confirma cu, e proximo paso lo ta; nombramento di candidato pa minister. Cu esey, lo yega na e proceso di partimento di cartera tambe pa e partido- y candidatonan pa minister. Ta spera cu den cared’i otro siman, tin mas claridad riba e candidatonan pa minister y tambe partimento di carteranan. Na final, Wever-Croes a menciona cu: “Mi ta spera cu mi no mester pidi un di dos verlenging na gobernador.”
