Recientemente Prome Minister, Evelyn Wever-Croes a menciona cu e asunto di “spookambtenaar” ta relaciona cu partido POR y no cu su persona. Aunke el a sigura cu bou su maneho y ministerio, Geerman a traha debidamente. Di otro banda, Otmar Oduber a vocifera cu Hans Geerman a traha p’e sigui pa Marisol Tromp y hasta pa Prome Minister, di cual hasta a pidi den Corte pa nan scucha Prome Minister como testigo den e caso di Flamingo. E pregunta riba spookambtenaar den gobierno tabata lansa pa Prome Minister durante su rueda di prensa di dialuna mainta.
Nos reportero a enfatisa n’e prome mandatario cu mas den siman por a nota un politico trece dilanti cu pa colmo tabatin uno den e Departamento di Prome Minister pa shete luna largo, pero e pregunta ta keda, si e tabata sa di dje, specificamente riba Hans Geerman.
Prome Minister, Evelyn Wever-Croes a comenta cu e caso di Geerman ta asunto di partido POR. Pasobra a tum’e den servicio door di Otmar Oduber y el a continua bao di Marisol Tromp.
E mandatario a indica cu un di e dosnan aki por duna un splicacion riba esaki. Pa loke ta trata su despacho, Wever-Croes a indica cu tur hende cu ta traha na su ministerio, sea cu a tuma over of no, tur ta traha of a traha. No tin ningun hende na su ministerio cu no ta traha.
Ora cu a tuma e ministerio over for di Tromp, ora cu e no kier a papia mas y tabatin conflicto cu parlamento, ora cu a yam’e tres dia largo pa papia y e ta ignora y despues a kit’e fo’i trabao, Wever-Croes a tuma parti di e ministerio over. Tur hende cu a keda cu ne, ya cu no ta tur a keda pasobra a laga nan bay, a traha.
Hans Geerman a traha pa Wever-Croes den e comision di inclusion, un persona dedica riba e tereno aki, cu a logra cos hopi importante.
Wever-Croes ta kere den e caso aki pa puntra Otmar Oduber riba Geerman, ya cu el a duna su comentario caba y mester puntra parlamentario Tromp dicon e tabatin e ambtenaarnan riba su payroll. No a pidi nan pa bin traha y no a haci nada al respecto.
Wever-Croes a indica cu tur hende cu e ta paga, ta traha. E no tin spookambtenaren. Tur ta traha, el a bisa por ultimo.
