Contrario na e informacion cu a sali diahuebs ultimo, Gobierno di Aruba ta informa cu e papel di 5 Florin di Censo NO a aumenta. E papel di 5 Florin, ta e documento di Registro Civil cu ciudadanonan di Aruba ta busca mas na Censo y na e MFAnan.
E extracto aki, popularmente a haya e nomber di ‘Papel di 5 Florin’ pasobra ta paga solamente 5 florin pe y esaki pa hopi aña ta asina y ta ancra den ley. Pa aumenta esaki y aumenta e suma pa 10 florin of cualkier otro suma, mester cambia ley.
Y e cambio den ley aki lo NO pasa. Gobierno di Aruba ta lamenta e bruhamento cu por a wordo causa y e intrankilidad cu esaki a trece cu ne. Gobierno ta sigura nos pueblo cu e tarifa di papel di 5 florin NO a aumenta.
Di otro banda e comunicado cu Alvin Molina di MEP a emiti, ta pa subraya cu mudamento di Hulpbestuurskantoor San Nicolas, tin un costo extra p’e ciudadano di San Nicolas. Tin cu paga ida y buelta den bus cu ta sinonimo di mas o menos 6 florin extra. Pues, na opinion di e parlamentario di San Nicolas, e habitante lo tin un costo adicional pa cubri transporte ida y buelta den bus, pa por busca su papel di Censo. Gabinete Wever-Croes, cu ta forma pa e propio partido MEP ta lamenta e bruhamento aki.
