Algun dia pasa a publica un primicia cu Minister Rudy Lampe (RED) ta nombra miembro di partido RED, Nora Eleonara, como hefe interino di DPS. Nos a publica e prueba tambe cu tabata un circulario caminda e propio consehero di Minister Lampe, Kristof, a invita tur hende di DPS pa bin haci conoci cu “onze nieuwe interim-directeur, mw. Nora Eleonora”.
Pa sorpresa di tur hende despues por a mira un video live di Parlmentario Ricardo Croes ta ataca prensa cu ta mentira tur esaki ta. Porcierto e presentacion di e Paralmentario, den tono y comportacion, tabata hopi emociona, descontrola y eratico. Nos no a sinti nececidad pa reaciona, pasobra hunto cu e noticia di nombracion nos a publica tambe e prueba di e circulario di e propio ministerio di Minister Lampe cu a invita coleganan di DPS pa bin “verwelkom” e directora nobo na DPS.
Awor no ta Prensa ta cuestiona e nombracion aki, pero propio coleganan di coalicion, den e caso aki lider di fraccion di MEP, Rocco Tjon. Den un serie di pregunta e lider di fraccion di MEP ta cuestiona e forma, sin un solicitud habri, cu e nombracion aki a tuma lugar. E preguntanan ta sugeri “vriendjes politiek” di parti di Minister Rudy Lampe. MEP ta hasta cuestiona cu Minister Lampe ta bisa di kier saca politica for di DPS y e mes ta nombra un hende di su partido, sin un solicitud habri, pa bira hefe nobo di DPS.
Ta na Parlamentario Ricardo Croes awor pa mira si e ta atende mes brutal cu Rocco Tjon cu e a atende cu prensa na momento cu a divulga e noticia aki. Ora cosnan ta cana asina dobla y iregular ta dificil pa prensa “cansa” di trece e berdad. Naturalmente e cos no lo caba akinan pasobra RED a coopera cu MEP y POR na un cantidad di nombracion di “friends and family” di Ministernan di MEP y POR sin lanta stof y awe nan nombracion di “friends” si ta worde cuetiona publicamente.
