Diligentemente e ministernan den Gabinete Mike Eman I y II pa actua den casonan relaciona cu e supuesto contrabanda cu Tabata sali di Venezuela. Awor por a scucha e minister di finansas y economia, sra. Xiomara Ruiz-Maduro ta actua y bisa cu e cos aki ta data for di 2016, cu gobierno di e tempo ey no a reacciona, ta un locura. E gobierno aki a reacciona debidamente, no for di 2016. Ya caba añanan prome cu esey tambe. Loke integrantenan di MEP tin cu haci ta wak nan mes den spiel, e ora por mira di cerca ta ken ta esunnan cu ta activo den actonan ilicito entre Venezuela y Aruba. E ora nan no mester bay mucho leu. Nan por stop esaki door di haci un paar di yamada na nan mesun amistadnan. Ta nan mesun hendenan ta esunnan cu aparentemente ta activo den e tipo di traficacionnan aki. Cu esey de Meza a expresa cu locual cu e gobernantenan awe ta trece dilanti, un biaha mas, ta un muestra cu nan no sa con pa goberna e pais aki, ta crea issuesnan, djis pa keda discuti y tira palabra pa gobierno anterior, na luga di cuminsa goberna.
Ta e mesun caso tambe por mir’e den persecusion politico. Por a corda cu manera nan a drenta den gobierno, inmediatamente nan a crea un fobia, a crea un nubia como si fuera cu tin aparatonan cu a disparce. Tin film di tur e aparatonan a entrega. Pa prome biaha den historia di Aruba caminda tabata tin un cambio, unda cu tabata tin computernan poni, printernan poni, faxnan poni. Un bestuurskantoor y un cocolishi cu a wordo laga atras, tur cos den bon estado cu por a sigui goberna. Por corda na 2009, ta con AVP a haya bestuurskantoor, cu tabata gewoon un luga totalmente decai, caminda cu tabata tin yuwana cu paloma ta biba aden. Un luga increibel a wordo laga atras door cu e gobernantenan di MEP mes kier a bende e cas di pueblo e tempo ey na comerciantenan.
E gobernantenan aki ta crea storia un biaha mas. Na luga di cuminsa traha y stop di yora. Na momento cu AVP a drenta na 2009 den gobierno, e pais aki tabata na rand di bancarota. Tabata un desaster total. Ta sigur cu tur hende sa di e problemanan cu tabata existi e tempo ey. AVP a drenta den gobierno, a lora manga y a cuminsa traha. Cuminsa dialoga cu e partnernan social, partnernan sindical y cuminsa tuma decisionnan pa rescata e pais aki. No a para un banda y cuminsa tira tur sorto di cos den laira y cuminsa kita hende for di trabao. Ningun hende a wordo kita for di trabao, pa nan color politico. Si hendenan a wordo kita despues, ta pa falta di trabaonan, iresponsabilidad cu nan mester a cumpli cun’e. Of investigacionnan a resulta den trabao malo cu nan a haci cu nan mester a wordo kita. Por a mira e casonan den corte con esakinan a sali tambe.
Locual cu por recomenda, e gobierno di MEP, POR y RED, stop di yora y cuminsa traha. Pueblo di Aruba a tuma un decision. No ta esaki ta locual pueblo kier a mira, pero a tuma e decision y riba un manera democratico, AVP ta respeta cu nan kier a forma un gobierno sin AVP den dje y cu nan kier a laga AVP afo y AVP a acepta esey. AVP no ta sinta eynan cu hamber pa poder pa goberna so. AVP tey pa sinta den oposicion tambe y vigila cu e pais aki sigui bay bon. Nan a escoge pa sinta den gobierno, bay traha awor aki. Cu nan a bisa cu nan tabata tin solucion, bay ehecuta e solucionnan. Bay baha e pensioen cu nan a priminti. Bay haci tur e cosnan cu boso a priminti y awo ta boso chens pa haci’e. Ya por a mira cu hopi tempo a bay perdi.
Por mira tambe den e persecusion politico, na comienso por a mira cu un persona cu tabata traha cu e gabinete Marko Espinoza a wordo persigui, encarcela y despues nan mester a lag’e bay, pasobra e tabata riba informacionnan falso, eroneo. Por a mira e situacion di un persona den prensa, sr. Nelson Andrade, kende a wordo saca for di Parlamento, cu mester a bay corte, busca su derecho y corte a dun’e su derecho tambe.
Esakinan ta actonan di persecusion politico.
