Nada bao di e shelo aki lo keda scondi. Esaki ta e tempo cu Dios lo saca tur cos na claridad. Dios ta cansa di hipocrecia di hende. Nos ta bibando den tempo cu kier silencia bos di oposicion. Nos di partido Curpa ta ricibi hopi informacion. Experencia di bida ta un enseñansa caminda bo no mester busca informacion sino informacion ta yega cerca bo.
E articulonan di partido Curpa a cuminsa duna efecto y wowo di nos pueblo a cuminsa habri. Den pais di dictadura bo opositornan ta crea tur sorto di evento pa susha bo nomber. P’esey tin e dicho porco sushi ta busca muraya limpi pa frega su curpa. No bay coba un buraco pa otro cay aden paso e buraco ey bo mes lo cay aden y esey ta locual cu ta bay pasa. Locual cu bo sembra lo bo bay cosecha.
Esaki nos ta yama witch hunt of caceria di bruha. Na final di añanan 90 partido MEP a busca moda di susha nomber di partido opositor di ta un partido homo pero awe den 2023 nan no ta haci diferencia pasobra principio di difunto lider di partido MEP no ta exisiti. Ora bo bira orguyoso y arogante locual cu ta na caminda ta caida.
Nos di partido Curpa a bin ta señala locual cu no ta bayendo bon ariba nos isla. Nos como yui di tera tin derecho pero tambe e deber di expresa nos preocupacion di locual cu ta bayendo malo. Nos ta un partido cu ta sali na defensa di esnan cu no por defende nan mes. Nos no ta perfecto pero nos meta ta semper pa cumpli cu e leynan di nos bon Dios. Si nos ta cana den e caminda di nos bon Dios, cu n’E como nos protector y e arma cu e enemigo kier uza contra nos lo boomerang contra di nan.
Partido Curpa ta e atalaya, e toren di vigilancia cu lo sigui saca tur cos cu no ta bay bon. Nos economia a florece pero gobierno no a sa di administra placa di pueblo. Ora bo ta haci bo mes doño di cos cu no ta di bo tin consecuencia. Bo por scapa for di e husticia terenal pero di e husticia di Dios lo bo no scapa di dje. Ainda bo por arepenti y drecha bo asunto cu Dios. E homber claba na e cruz banda di Jesus mes a arepenti na ultimo momento. Bo tin oportunidad tambe.
Nos ta na vispera di un reunion di Parlamento caminda cu kier pusha un BBO na frontera di 7% y gobierno den su terkedad no kier realisa cu pueblo no por mas. Un gobierno cu kier biba di pasado pero no kier habri su wowo pa mira locual cu e ta ocasionado den nos presente y pa nos futuro generacion.
For di aña 2018 gobierno no a stop di fia. E tempo ey 485 miyon florin, na aña 2019 a fia 270 miyon florin, na 2020 gobierno a kibra e record di 1.5 biyon florin, na 2021 a presta 85 miyon florin, na 2022 a sigui pa fia 185 miyon florin y awo na aña 2023, cu no a yega na su fin ainda, ya a fia 365 miyon florin caba. Pueblo na aña 2027 nos pais tin un debe di mas cu 1 biyon florin ta caduca y ta con lo bay haci?
Ora partidonan politico ta bay contra di ley di Dios, locual cu nan lo ricibi ta e cosecha cu nan a sembra. Tur cos tin su tempo y esaki ta e tempo di Dios pa Aruba. Bula ariba cay abao, locual cu ta na caminda ningun hende por par’e. Dios su tempo ta perfecto. Dios a crea e homber y e hende muhe. Pa mas cu 5 mil aña no tabatin problema cu e famia cu Dios a crea.
Unico partido cu ta para pa principio di Dios ta partido Curpa. Partido Curpa ta e unico alternativa. Si kier bringa partido Curpa…go ahead, pero no lubida cu bo no por bringa nos bon Dios pasobra lo bo no sali gana.
