For di marduga tin presencia policial na altura di e cas di Prome Minister Evelyn Wever-Croes, na Sero Blanco.
Henter anochi y marduga personal di Mobiele Eenheid, cu ta e team special di polis, tabata na cas di e prome mandatario.
Motibo cu nan tabata na e cas ta cu lo tin un of otro menasa dirigi riba e prome mandatario. Ta e unico forma cu esaki por sosode. Probablemente lo tin cierto menasanan y esey ta haci cu ta pone extra vigilancia 24 ora pa dia riba e prome mandatario di pais Aruba.
Probablemente expresionnan haci den e dianan aki den un of otro protesta a causa esaki. Manera conoci tabata tin algun protesta dilanti di Parlamento y a haci algun expresion cu a pone hende pensa hopi. Pa e motibo aki mes a duna e prome mandatario e extra vigilancia pa evita cu e grupo aki lo yega den e area di e cas di prome minister Evelyn Wever-Croes.
Ta na su luga pa haya claridad di kico ta pasando y di parti di Ministerio Publico tambe of Alto Mando Policial, riba e motibo cu tin extra vigilancia y 24 ora hasta p’afo di e cas di prome mandatario Evelyn Wever-Croes.
Keda pendiente pa mas informacion durante e dia di awe, hunto cu Alto Comisario, pa asina confirma kico ta pasando.
