Diahuebs anochi alrededor di 8:45 pm polis a presenta cu urgencia den Rooi Afo p’un situacion basta serio. Ta un homber cu a menasa un dama via WhatsApp cu e lo tir’e mata. Parce ora e homber a WhatsApp e dicho dama, e tabata para pafo di su cas ta ward’e sali p’e tir’e.
Haciendo un investigacion mas profundo, a resulta cu ta trata di e mesun problema cu mas trempan polis a atende cu ne na stadion na Dakota. Ta mas trempan ora cu casa a topa su homber cu un amante. Cos a bay asina leu cu a hala otro na conopi formal. Mas despues, e homber a bay cas di e supuesto amante pa mat’e, segun informacion ricibi.
Pues, mas trempan tur cos tabata cuchi cuchi pero ora a gara nan, awo kier tira su amante mata. Ora polis a yega na cas di e supuesto amanta na Rooi Afo, ya e homber a bandona den un Suzuki Vitara. No a dura mucho cu polis a topa cu e Vitara, den Rooi Afo mes. A detente e homber mesora pa djey transport’e pa warda di polis pendiente mas investigacion. A confisca e auto p’asina contribui n’e proceso investigativo. Como tres unidad di polis tabata presenta compaña pa e team forensico y recherche.
