Un biaha mas Mediador di Gobierno ta enfatisa cu apesar di e situacion laboral, no por kibra un CAO den forma unilateral. E ta algo cu tin su provision den ley.
Den e situacion di pandemia existente hopi doño di trabou ta trata di kibra CAO, cual no por haci. Mediador Anselmo Pontilius a splica cu esey a pone cu hopi dunado di trabou a sinta na mesa cu sindicatonan. Asina algun hotel a logra cu aumentonan palabra pa januari, 2021, no ta sigui. A yega na un acuerdo pa pospone esaki.
Tambe a yega p.e. na acuerdo cu e bonus di december ta 20 pa 30% menos y na algun sitio a baha e cantidad di dianan di vakantie. “E ta un forma di economisa cu tin menos gasto pa e compania y na mesun momento mantene cuponan di trabou.
Na momento di yega na e punto di sinta na mesa, no mester lubida cu e doñonan di trabou tambe ta keda cu su gastonan mensual di awa, coriente, telefon. Ta gastonan cu tin na momento cu laga e negoshi bay den operacion. “E gastonan ey ta keda, p’esey e apelacion urgente pa partidonan bay mesa urgente na januari y papia di kico por spera den 2021.”
