Sindicato FTA a reuni dialuna mainta cu Mediador di Gobierno riba peticion di gerencia di Domesa unda a haya un carta siman pasa cu nan kier preveni trahadonan bolbe bay den accion, pa para trabao cu tur su consecuencianan. Nan a pidi e mediacion anto a papia cu ambos partido dialuna mainta, mediador a haci peticion na FTA pa wanta cualkier accion cu nan tin of lo kier haci, y nan a bay di acuerdo pa dentro di un siman resolve e diferencia cu tin.
FTA ta reclamando cu e compania ta violando e Contracto Colectivo vigente, a discuti e articulonan anto mediador a duna algun sugerencia. “E dunado di trabao den e caso aki ta bay interno, y trata loke ta tumando luga. Pago cu lo ta incorecto na momento di overtime, y nos a bisa nan si resolve of no, nos kier topa nan bek diamars otro siman 19 di maart, y nos ta convenci nan por resolve esaki den forma amical ya cu FTA cu Domesa ta dos partner cu hopi aña den relacion,” segun Anselmo Pontilius, mediador di Gobierno.
E partidonan a firma un CAO pa hopi aña y aworaki FTA ta reclama cu tin violacion sigur riba un articulo cual ta pago di overtime, particularmente den fin di siman. Aworaki a conseha nan pa revisa pasobra no ta asina cu un dunado di trabao por cambia di forma unilateral loke a acorda cu partidonan, ley ta atende cu ne. Na momento firma un CAO, ley ta proteha esaki cu si dos partido a firma un acuerdo, ambos ta bini hunto pa cambi’e of propone pa cambio. Pero uno no por cambie riba su mes, sin consulta.
“Den e caso aki e trahadonan a sinti nan perhudica financieramente y lo mester por resolve esaki den forma amical.” Na cierto momento segun e mediador ta trata di interpretacion, pero particularmente ora ta papia di pago di un hende, su entrada cu ta afect’e, ta sinti esaki mesora y ta trece mal contento innecesario na pia di trabao.
E parti di overtime ta e articulo na e momentonan aki na discusion. Nan tin un CAO cu a firma for di maart 2023 y ta bisa cu tur otro articulo ta cumpli debidamente. Pa loke ta e parti di busca un trahado den forma ilegal a bolbe keda menciona den e reunion, via Zoom, e motibonan tabata t’ey anto a scucha e parti di keho.
Riba e tema aki e compania ta bisa di a clarifica esaki. “Ta spera tambe pasobra e ta un iresponsabilidad di cualkier compania pa pone un hende cu no tin documentonan na ordo traha. Mas ainda un compania cu ta asumi responsabilidad grandi di transporta balornan y fondonan di companianan priva.”
