Den e buki di Job capitulo 1 versiculo 4+5, bijbel ta papia di e yiunan di Job con nan tabata haci fiesta y con Job tabata haci oracion pa nan bisando: Por ta mi cu yiu hombernan a peca y a maldiciona Dios den nan curason. Asina Job tabata haci continuamente. Y tambe e tabata consagra nan na Dios.
Wak bon Job, no tabata bisa mi yiunan ta bon mucha, nan no ta haci nada malo, nunca nan a kibra un copi. E tabata haci oracion pa nan, pasobra hopi mucha ta haci cos cu nan mes no sa kico nan ta haci, pero nos como mayor mester tuma e asunto na serio y cuminsa pidi Dios pordon pa nan, y no bisa ay no, no ta nada ta mucha nan ta, pasobra locual nos ta bira lomba pe awe, mañan cu Dios kier, berguensa lo confronta nos como mayor (Colosenses 3 vers 20).
Bo tin di haci oracion pa bo yuinan, (Mateo 18:19) pasobra nan tin un enemigo cual ta e diabel, kende kier daña nan futuro, kier kibra nan pia, kier stroba nan estudio, hinca nan den problema cu husticia. Pa asina nan crece sin integridad, y keda den gara di diabel como alcoholico, drogadicto, bandido etc. Y abo como mayor ta biba constantemente den tristesa. Bijbel ta bisa den Efesios capitulo 6 versiculo 1- 4, pa e mayornan lanta nan yiunan den e disciplina y instruccion di Señor.
Oracion di mayor ta un mantel riba bida di bo yiunan, pasobra abo como mayor no solamente ta responsabel pa cuminda cu paña, pa un bon telefon, pero bo ta responsabel pa cubri bo yiu bao di e sanger di Cristo Hesus (1 Cronicas 29 versiculo 19).
P’esey ta necesario, esencial y primordial pa abo como mayor conoce Cristo Hesus como bo Señor y Salbador. Y asina bo por guia bo yiunan den e caminda di berdad y bida, pa asina nan por cana bon dilanti di Dios.
Un mayor mester haci oracion na Dios , y pidi Dios mustr’e cualkier cos cu ta bay robes den bida di su yiu y saca e situacion na cla sin miedo y pa Dios interveni, y aleha hende malo for di den su caminda, aleha mal amistad, no permiti cu probechador y abusador por drenta su bida. Pasobra no ta tur abuso ta sexual, tene bon cuenta cu esey. Tin mucha ta wordo manipula constantemente, ta bully nan y tur esey oracion tin poder pa caba cu ne.
Oracion tin mas poder cu bruheria, oracion tin mas poder cu placa, pasobra no ta tur cos placa por soluciona. Oracion ta un suplica na Dios pa E interveni den bida di nos yiunan cu hopi biaha no ta mira e peliger of no kier tende. Pero nos cu ta hende grandi, cu tin exeriencia di bida, no mester ta discuti henter dia cu nos yiunan. Nos oracion ta haci e trabao dilanti di Dios pa nos.
Nos oracion ta e polis secreto pa nos cu ta aresta satanas den nomber di Cristo Hesus, y asina e kita su man sushi for di nos yiunan,y hala leu for di nan. Mayornan, den tempo trabahoso cu nos ta bibando aden, nos mester para firme den oracion pa nos mes y nos yiunan.
