Un situacion situacion hopi lamentabel a tuma luga cu un grupo grandi di famia bibando riba un tereno di huur na Calbas. Nan a cera un acuerdo di huur y tabata paga cuentanan di utilidad via di “doño”, pero finalisando aña a bin haya nan mes cu un noticia desagradabel.
Nan a keda sin coriente y no sa tampoco si por haya conexion prome cu final di aña.
Un parti di e famia a acudi awe den oranan di merdia pa atardi na ELMAR pa mira si por logra yega na un solucion pa e mas di 18 famia consistiendo di 50 persona bibando riba e pida tereno aki.
A combersa cu Briñis Montero, kende tin shete aña bibando den su trailer riba e tereno cu el a huur na Calabas, unda cu cabalmente nan a paga tanto coriente como awa. Pa nan sorpresa, a bin tende awo cu e homber cu kende nan a cera e acuerdo, tin un debe masha grandi tanto na ELMAR como na WEB. “Kico el a haci cu e placa nos no sa. Pero e si a bini ELMAR awe y a reconecta su meter pero anos si a keda sin coriente,” Montero a conta.
E grupo a papia cu ELMAR pa mira ki solucion por yega na dje, pero lamentablemente e hefe na ELMAR a contesta cu nan no por haci nada. E unico solucion ta pa e doño presente y firma pa conecta meter pa nan. “No por cu nos mester pasa Pasco den scuridad, e no ta husto,” el a bisa rondona pa algun di e otro personanan cu ta biba riba e tereno tambe.
Mas tristo ta cu no por haci ningun reconexion of conexion, pasobra e tereno ta pertenece na DIP, cu a kit’e for di 5 aña pasa for di nan y ningun el a informa e habitantenan. Tur e 5 añanan ey nan a paga huur di e tereno y tambe awa y coriente. “Kico el a haci cu e placa, nos no sa. El a perhudica 18 famia cu ta bibando den nan mesun trailer.” Mirando e situacion, nan ta pidi ayudo di instancianan concerni pa por haya coriente. Ta hopi tristo pa keda sin coriente hustamente den e temporada aki.
Tin mas cu 18 famia, consistiendo di 50 persona of mas, cu ta biba den un di e trailernan riba e tereno aki na Calabas. Di e grupo aki tin nada menos cu 15 mucha cu ta bay scol. Y tur hende nan coriente ta conecta riba e meter di e homber Winfred Petronilla.
A presenta tur e recibonan di pago cu nan a haci na e hendenan aki. “Nos kier ayudo pa sigui biba trankil, of cu conexion di coriente.” Pa colmo a tuma contacto cu huurcommissie, cu a trata di busca un solucion pa nan, pero DIP a simplemente bisa e hendenan cu nan mester bandona e tereno. Pero ta dificil pa nan bandona e tereno despues di tin hopi aña bibando eynan. “Nos ta deprimi cu e situacion,” un di e habitantenan a expresa. Nan a pidi si ta posibel pa pone un meter pre-pago te ora cu nan yega na un solucion definitivo. Pero ta e doño mester acudi pa firma esey.
No solamente esey, pero den pago di coriente tambe nan a wordo horta. Nan a nota riba un cobransa awo cu e tarifa ta di Afl. 0,45 pa kw y pa hopi aña nan a pague 1 florin pa kilowatt na e homber, cu awo nan ta considera esey un estafa. E homber a gana placa cu tereno di Gobierno y cu coriente di ELMAR. “Nos kiier un ayudo, nos kier un solucion,” vocero di e famianan ta bisa.
