Luna di october tabata luna di conscientisacion riba cancer di pecho.
Mary Joan Foundation tabata varios caminda ta duna informacion pa haci test di pecho tanto pa hende homber y hende muhe.
Luna di october tabata un luna sumamente druk pa nan unda cu nan tabata duna hopi charla na diferente instancia.
E mensahe di e aña aki ta bisa cu ora constata cancer di pecho na tempo, tin cura p’e.
Den e cuadro aki Mary Joan Foundation ta para pa duna charla y tambe yuda unda cu por cu nan trabaonan diario, cual ta e ayudo psicosocial pa su clientenan. Tambe pa e pueblo di Aruba completo.
Den cuadro di esaki den luna di october ta haci nan colecta. Aña pasa no por a haci esaki debi na e pandemia. E aña aki nan a haci algo otro door di graba algun video, cual nan tin publica riba nan pagina di Facebook. Nan a graba video riba radioterapia na IMSan, nan tin video di Mamapoli y tambe dr. Vis cu ta splica detayadamente con pa samina e pechonan. Fuera di esey nan tin varios testimonio.
MERCADO DI SALUD
Diasabra nan a tene nan mercado di salud, cu lo tuma luga na Centro Kibrahacha, cuminsando pa 9:00 am y lo caba 2:00 pm. Aki Mary Joan Foundation lo ta hunto cu varios partner. IMSan lo t’ey no solamente pa e parti di Radioterapia pero tambe ambulance.
Tambe lo tin Wit Gele Kruis, departamento di POH y tambe di Wijkzork. Nan lo check sucu y presion. Tambe lo duna informacion di tur servicio cu nan ta ofrece. Tin biaha no ta consciente cuanto servicio cu e instancia aki ta ofrece.
Hospice Atardi tambe lo t’ey pa duna informacion. Hopi hende na Aruba no sa kico tur Hospice ta ofrece.
IBisa lo duna e parti di salud y deporte. Lo tin informacion y demostracion den ‘hindernis baan’ di Kibrahacha.
Den un otro local lo tin Stichting BOB cu lo duna informacion riba Mamografia, por inscribi y tambe lo tin informacion adicional.
Koningin Wilhelmina Kankerfonds tambe lo tin informacion y presentacion.
Mary Joan Foundation tambe lo tin informacion y lo presenta nan proyecto di peluca cu nan tin un par di aña caba.
Martijn Trading lo t’ey cu diferente producto. Transition to Health lo ta bao di e gazebo na Kibrahacha. Nan lo bin cu chair massage y arm and hand massage. Entre 1:00 pm y 2:00 lo tin yoga. Aki tambe lo tin informacion di salud.
Fuera di esey, parti patras lo tin Mochila Creativo unda cu nan lo tin un tayer y tambe suministra informacion di kico nan lo bin cu ne.
Vanessa Paulina lo papia riba arte. Tambe e lo trece dilanti dun proyecto cu e tin.
Centro Kibrahacha mes lo duna informacion. Nan ta haci hopi cos eynan, entre otro ehercicio, baile, etc. y tur loke nan ta ofrece.
Pasa bishita e Mercado di Salud, y haya sa mas riba e dia aki. Entrada ta gratis. Ta spera tur hende cu ta interesa pa bin.
BIKE RIDE
Fuera di e mercado di salud Mary Joan Foundation ta preparando pa un Bike Ride dia 7 di november yama Live your life free. Un cliente di Mary Joan Foundation, hunto cu Shoco Bikers, cu lo organisa e evento aki pa recauda fondo, mirando cu nan no por haci e parti di colecta.
E ride ta cuminsa na Carnival Village pa 5’or. Ta reuni pa 4’0r di atardi. Lo pasa diferente parti na Aruba y lo caba na Mary Joan Foundation. Na final ta haya un snack box y lo haya e boton di Mary Joan Foundation. Contribucion pa esaki ta 25 florin pa persona. Pa registra por manda un whatsapp of yama na 5940919, cu por manda e link of formulario pa por haci e parti di registracion. Pago lo bay via banco, sea Aruba Bank of CMB.
Di parti di Mary Joan Foundation, ta gradicido pa e contribucion haci. Cada contribucion ta pa yuda e clientenan. Mester di material y pa tene actividad cu e clientenan.
Ta pidi pa esunnan cu no ta participa den e Ride, para na banda, bisti algo ros, apoya e grupo pasobra e clientenan lo bay ta riba e brommernan. Lo ta great pa para band’i caminda y apoya den esaki.
ACTIVIDAD PA E CLIENTENAN
Aña pasa Mary Joan Foundation no por a tene e actividadnan di custumber cu su clientenan. Pero lamentablemente aña pasa nan por a haci esaki, mirando cu e pashentnan ta di alto riesgo. Sinembargo e aña aki e actividadnan a continua. Ultimo nan a bay riba catamaran cu nan y tambe a bay cinema cu nan. Awo nan ta pendiente pa un actividad di Pasco. Ta actividadnan pa distrai e pashentnan y tambe pa nan topa cu otro, unda cu nan ta sinti nan mes cu mas confiansa.