Aruba Marriott ta sumamente contento pa anuncia cu Marriott International Inc. a nombra Arubiano Antoinette van den Berg como Vice Presidente di operacionnan di benta y mercadeo pa Caribe y Latino America.
Den su papel nobo, Antoinette lo supervisa e directornan di e area di benta y mercadeo pa e region y alaves e lo mantene su responsabilidadnan pa Caribe. Adicionalmente, e lo forma parti di e Team di Lujo y lo dirigi esaki pa e disciplina. “Antoinette ta trece hopi aña di experencia extensivo den e region di Caribe y Latino America y a sa di sobresali como directora di benta y mercadeo pa e area den diferente ocasionnan y mercadonan. Ta su pasion pa Caribe y segmento di Lujo cu tabata e ingridientenan principal pa su exito”, a comparti Alez Fiz – Vice Presidente regional di benta y mercadeo pa Caribe y Latino America.
Ta debi na su pasion pa hende y crea relacionnan duradero, Antoinette – naci y lanta na Aruba – tabata sa cu for comienso di su carera profesional, cu e lo kier forma parti di e industria di hospitalidad. El a cuminsa cu Marriott na 2005 como gerente senior di benta na Aruba Marriott Resort & Stellaris Casino y despues a wordo promovi pa directora di benta y directora di benta y mercadeo pa e hotel. Antoinette a identifica su mes cu e balornan y
cultura di Marriott na un etapa hopi trempan, cual tabata e factornan primordial cu a encurashe pa keda y crece den Marriott. “Mi ta admira tur locual Sr. Marriott y su famia a hasi pa e industria di hospitalidad, como tambe pa su asociadonan y pa comunidadnan. Tur ora cu nan puntrami unda mi ta traha, cu hopi orguyo mi ta comparti cumi ta traha pa Marriott International”.
Na 2013, Antoinette a muda for di su pais natal pa Florida den su trancision pa directora di area di benta y mercadeo pa e region di Latino America cu Marriott International Inc. y desde 2014 Antoinette ta supervisando e disciplina di benta y mercadeo pa Caribe como directora di area di benta y mercadeo. Antoinette a gradua di Boston College na Massachusetts cu un Bachelor’s degree den mercadeo. E ta casa cu dos yui muher y ta disfruta di su tempo liber biahando cu su famia y specialmente apoyando su yui muhernan na pool mientras nan ta practica y competi den nan deporte faborito di natacion.
Antoinette ta un ehempel briyante di un hende muher Arubiano cu a cuminsa su carera como un hoben profesional riba e isla y a traha un carera internacional impresionante debi na su trabao duro y determinacion fuerte pa crece. Esaki ta mustra cu maske cu e ta bini di un isla chikito, su perseverancia a habri hopi porta pe internacionalmente y a dune e oportunidad pa crece dentro di un compania multinacional. Segun Antoinette, pa un hoben profesional ta exitoso, e mester ta ansioso pa siña tocante diferente aspectonan di e industria di hospitalidad y turismo, como cu crecemento lo bin naturalmente, “tur cos den bida lo bin na e momento corecto, y uno mester traha duro, ta curioso, scucha y siña, tuma riesgonan y no tin miedo di puntra pa ayudo. Mas bo sa, mas balor bo lo tin. Busca bo pasion y tuma e oportunidad pa biaha rond di mundo, explora y expande bo fronteranan,” Antoinette a comparti.
Mirando pa futuro, Antoinette ta sinti su mes sumamente satisfecho cu e meta aki cu e la alcansa den su carera y pa prome biaha no tin nada planea den su future inmediato. E sa cu na cierto momento e lo kier regresa bek na su “Isla Feliz” y haya un manera pa sigi cu su carera den Marriott.
