Fraccion di MAS a manda un otro carta pidiendo prome minister Evelyn Wever-Croes pa duna claridad y transparencia p’e caso di Aruba Huis. Na mas di un ocasion e mandatario mes a splica den parlamento cu lo tin un investigacion andando di CAD (Centrale Accounting Dienst).
drs. Marisol Lopez-Tromp, lider di fraccion MAS, a indica cu despues nan a tende cu tin investigacion haci door di Departamento di Recurso Humano (DRH). E fraccion a pidi prome minister pa manda parlamento un copia di e rapport di CAD, caminda cu nan lo investiga posibel, supuesto iregularidad na Aruba Huis. Y asina e fraccion ta pidi den cuadro di integridad y transparencia pa manda nan e relato aki.
Lopez-Tromp a bisa cu nan tin tur derecho pa ricibie y pa mira kico a sosode, pasobra ta trata placa di pueblo. Den e caso aki nan ta mira cu prome minister a bisa algo straño. Segun e parlamentario, e mandatario a bisa cu e rapport no ta cla. E investigacion aki a cuminsa basta tempo atras. Aunke e ta bisa cu e rapport no ta cla, den mesun rosea prome minister ta bisa cu nan ta trahando riba e sugerencianan cu DRH y CAD a duna nan.
Esaki ta zona contradictorio, pasobra esey kiermen e rapport ta cla. “Pa por tin e consehonan, e sugerencianan, bo a lesa e rapport aki y den ki forma cu e ta, si e ta cla nos tin tur derecho pa pidie. Y abo como minister tin e deber pa entreg’e na parlamento”, tabata palabranan di Lopez-Tromp.
Pa mas lesa TREMPAN.COM.
