Compleho di Aruba Marriott ta felicita Antonio Ras – Loss Prevention Supervisor y Tisha Powell – Loss Prevention Officer, cu nan reconocimento di Bill Marriott – Presidente di Marriott International – despues di a salba bida di un huesped na maart 2022.
E reconocimento aki ta conoci den Marriott International como e ‘Chairman’s Citation’ award, cual ta diseña pa reconoce asociadonan cu tabata parti di un esfuerso pa salba un bida, pa asina gradici e asociado pa nan acto di balentia y alabes promove siguridad en general dentro di e compania di Marriott International.
Training, teamwork y balentia tabata e formula cu a yuda salba bida di e huesped ora cu a bati alarma pa ayudo den un camber unda tabata tin un huesped sin pulso despues di a haya un infarto. Antonio y Tisha a reacciona inmediatamente pa duna asistencia por medio di CPR y uzando e ‘automated external defibrillator (AED)’ pa asina stabilisa e huesped mientras tabata en espera di yegada di ambulance.
E reaccion y accion di Antonio y Tisha ta un acto heroico y di admira, cual sigur Bill Marriott tambe a reconoce den un forma bunita di aprecio por medio di e reconocimento grandi aki.
Mas di e Compleho di Aruba Marriott:
Aruba Marriott Resort & Stellaris Casino a habri na aña 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott ta consisti di mas o menos 1200 empleado den servicio directo. E compleho di Aruba Marriott ta esun di mas grandi den henter Caribe, tanto den cantidad di camber como den cantidad di empleado.
