Dialuna a trata presupuesto 2022 pa loke t’e carteranan di Prome Minister mr. Evelyn Wever-Croes y Minister mr. Xiomara Maduro. Lider di fraccion di MAS, drs. Marisol Lopez-Tromp a trece varios pregunta dilanti p’e ministernan presente den parlamento.
Un di e preguntanan cu el a haci t’e hecho cu no tin fin di baha gasto di personal. A ilustra esaki a base di un palabracion cu prome minister mes a haci fo’i 2018, cu e lo rebaha e gastonan di personal structuralmente entre 2018 pa 2021.
A ilustra tambe con CFT ta mustra den un publicacion reciente cu gobierno no ta cumpli cu e rapport aki y cu cada biaha ta ripiti e mesun punto, pa cumpli cu e ‘beleidsplan verlaging personeelkosten’. Lopez-Tromp a puntra prome minister y en particular n’e minister di finansa, Xiomara Maduro, kico ta stroba nan di ehecuta esaki.
Sa cu tin nombracion ta tuma luga. Sa tambe cu ta cera contract y den e caso aki hasta DVO (Dienst Verlening Overeenkomsten) cera den e ultimo tempo, mientras cu nan tin cu baha gasto den forma structural.
E parlamentario a ilustra kico e conseho tabata e tempo ey, con nan no ta cumpliendo cu ne y lo mas principal, cu aparentemente ta mustra comosifuera den un documento cu nan lo por ta cumpliendo cu cierto norma, pero e ta algo cosmetico. Pueblo cu ta e trahado, cu ta aportando e 12.6% tur luna di su salario cu e ta traha p’e y cu den e momentonan aki pa ley e mester ta paga, pero cu gobierno ta wanta di dje, ta loke gobierno ta uza pa tapa e buraco cu ta pone cu e no ta tuma pasonan structural. Simpel bisa, e ambtenaarnan ta yudando gobierno aparenta manera cu e ta cumpli cu baha su gastonan. Pero en realidad, e no ta cumpliendo di tuma paso structural. Ta laga ambtenaar y esunnan cu ta aporta n’e porcentahe aki entrega y ta mustra nechi, pero e no ta cumpli cu palabracion. Esey ta loke cu Lopez-Tromp a mustra minister, kico ta loke ta strob’e di cumpli despues di tanto aña asina ki.
Pa mayor cobertura lesa TREMPAN.
