Diabierna den oranan di merdia a surgi un confrontacion na radio entre Parlamentario drs. Marisol Lopez Tromp cu e periodista Toko Winklaar.
Tabata durante e noticiero di merdia cu e presentadornan Winklaar y Simon Arends tabata comenta riba e caso Avestruz, inval na mas o menos 10 adres na Aruba y Corsou, y a menciona nomber di Parlamentario Marisol Lopez Tromp. A papia di dos inval cu a tuma luga na adresnan cu tin di haber cu un famia Neme.
A menciona cu e famia aki no ta conoci di a haya tereno for di e Gobierno anterior pero si den e Gobierno cu tempo Marisol Lopez Tromp tabata Minister di Infrastructura. Inclusive e propio ex Minister Benny Sevinger a menciona cu hopi di e documentonan cu nan a bay cun’e tabata di tempo cu Marisol Lopez Tromp tabata Minister.
Ta parce cu esaki a “trigger” algo den Parlamentario kende a bira yama e radio-emisora y a bay den un confrontacion bisando cu e tin derecho pa duna su banda y cu e no a wordo consulta riba esaki. “Mi no ta envolvi den ningun caso di falsificacion, estafa of labamento di placa. Mi ta drumi anochi trankil. Tur mi documentonan ta na ordo y p’esey mi a gana tur caso den Corte.” El a menciona cu e tabata Minister mas cu 10 aña pasa y Sevinger Minister 8 aña durante cual si tabatin algo ilegal, e lo por a haci denuncia. “Esey ami lo haci si mi mira cu algo no ta corecto of ta iregular. Pues ami no ta meti den ningun caso di corupcion,” e Parlamentario a bisa.
Na momento cu Ministerio Publico a manda su comunicado di prensa, a menciona cu e investigacion ta concentra riba e añanan 2009 pa 2017 y esaki mesora a causa hopi speculacion. Pa cuminsa gran parti di 2009 AVP (cu tabata den Gobierno y Minister Sevinger tabata Minister di Infrastructura) a goberna apenas 2 luna. Tabatin eleccion na september 2009 y e Gobierno nobo di asignatura berde a sinta for di 30 di october, 2009 te 17 di november, 2017. Na di dos luga, e fam Neme no ta aparece den e proceso di otorgamento di tereno di Gobierno berde. E ta conoci si den mundo politico y a wordo hopi specula di su vinculo cu e politico Marisol Lopez Tromp tempo cu e ultimo aki tabata Minister, hayando supuestamente varios tereno. Pero Lopez Tromp a bisa cu tur su documentonan ta na ordo. “P’esey mi a gana tur mi casonan den Corte.” Niun momento el a desmenti cu Neme a yega di haya tereno di Gobierno tempo cu e tabata Minister di Infrastructura of si e tabata sponsor den campaña of no. Tur esakinan ta keda habri pa aworaki.
Awo ta keda na Ministerio Publico pa bini dilanti y specifica si ta solamente e periodo di Gobernacion di AVP ta investiga, cual ta e denuncia haci door di integrantenan di partido geel (MEP).
