Pa di dos biaha den un siman un vehiculo ta drenta sea un cas of negoshi despues cu chauffeur a perde control pa un motibo of otro.
Despues cu e Mercedes a drenta un negoshi riba Boulevard, e biaha’ki un hoben a drenta cu su auto den patio di un cas. Diaranson mainta tempran a pidi presencia di Polis den Fleminstraat na Playa pa un accidente cu persona herida.
Na e sitio ta topa cu un hoben y un auto Hyundai i10 cu a practicamente drenta patio di e cas. E cura ta combina cu e auto y e chauffeur despues di perde control a drenta e parti ey cu su auto.
Kico exactamente a pasa no ta conoci. Ta papia cu el a perde control dado momento pasobra el a bay den panico ora cu un maribomba a pik’e.
Ora cu el a sali for di auto ainda e tabata den susto. Paramediconan a atende eybou mes y no mester a transporte pa hospital.
