“Ayera mainta mi a tuma nota di un noticia cu a sali unda ta insinua cu supuestamente colega Miguel Mansur su grito a haya oido y awor tur parlamentario a haya parkeerplaats. Esaki sigur no ta cuadra cu e berdad y ta basa riba un conclusion eroneo”, asina e parlamentario di e fraccion di MEP den Parlamento, esta Marco Berlis a duna di conoce den un relato pa prensa.
E parlamentario nobo ta insisti cu nan como fraccion di MEP a traha riba esaki pa algun tempo caba, pesey DOW a pone e prome borchinan inicialmente for di algun siman caba. Ora nan a mira cu esaki no ta funciona y cu toch tur hende tabata parkeer den e espacionan reserva pa parlamentarionan, a haci un otro peticion pa mehora e parkeerplaats cu mas borchi na cada un y hasta a sugeri pa pone numbernan di auto di cada parlamentario na cada espacio.
“Locual ta mira awor aki como un logro pa parlamentarionan sigur no tin nada di haci cu Miguel Mansur”, segun parlamentario Berlis a insinua. E realidad sinembargo ta cu na ningun momento parlamentario Mansur a bisa di a regla parkeerplaats pa parlamentarionan, al contrario, el a condena e hecho cu dos parlamentario di MEP tabata staciona ilegalmente na luga prohibi!
E discusion a start debi cu dos miembro di parlamento tabata staciona na e luga destina pa e presidente y pa e griffier di Parlamento y ta for di ey a start un discusion. Parce cu paden e parlamentarionan a expresa palabranan menos bunita contra otro tambe, djis pa un parkeervak! Ora cu e tema a subi mesa, mesora a nota cu DOW a manda trahadonan traha overtime den marduga pa regla e parkeo dilanti edificio. Cu si ta Mansur a regl’e of no, si no tabata pa e discusion riba esunnan cu ta parkeer ilegal, probablemente DOW lo no a core regla e asunto den weekend.
Tocante Berlis (MEP) y Mansur (A21)
Marco Berlis a subi lista di MEP, cu un anuncio haci riba dialuna 12 di april 2021. El a participa den e ultimo eleccion como number diesshete riba lista y a logra no menos cu 232 voto. Miguel Mansur a funda partido Accion 21 y a participa den e ultimo eleccion pa prome bes. El a logra 2019 voto preferencial, riba su nomber. El a resulta e di cinco votegetter den eleccion 2021, despues di Evelyn Wever, Mike Eman, Marisol Lopez, y Dangui Oduber.
