Mientras cu tur atencion ta na eleccion, entregamento di listanan politico y pandemia, den hospital tin un mucha interna cu mester ayudo urgente, pero no ta sigura na AZV y no tin un permiso legal di estadia riba nos isla tampoco. Esaki ta obstaculisa henter e proceso di tratamento y su mama ta man na cabes y ta pidi ayudo, specialmente di minister mr. Andin Bikker, pa no laga su yiu muri.
Sara Ramos ta mama di e pashent Salome Semanate, kende ta hospitalisa. E tin apenas shete aña di edad y e ta gusta hari, pero tambe ta disfruta di lama. E ta hospitalisa pa motibo cu e tin un recaida di leucemia. Na Colombia el a haya e enfermedad y e mama a lucha cu ne. Salome a vence e cancer y e mama a opta pa nan sigui biba nan bida. Pero aña pasa, nan a bin vakantie na Aruba y a keda pega memey di e pandemia. A pidi permiso na DIMAS pero e proceso ta cana lento y no ta cla ainda. Y tanten e permiso di e mama no keda cla, no por procesa esun di su yiu tampoco. Esey ta causando problema serio awor, pasobra e yiu a bira malo y mester atencion medico urgente.
E mucha a bira malo, tabatin keintura, no tabata por a cana bon y su mama a hib’e dokter. A bin saca afo cu e leucemia a bin bek, pero e biaha aki a bin mas duro. Specialista a start un plan di cuido pa e criatura, pero e mama mester paga pa cada dia cu e ta interna den hospital, locual no ta barata. E mama ta pidi pa yudansa di minister Andin Bikker, pa e haci tur locual ta den su alcance pa yud’e como un mama desespera. Ramos kier ayudo pa su yiu, pasobra na Colombia el a lucha contra e enfermedad aki. E enfermedad aki ta fuerte y no ta facil pa atende cu ne.
E tin di bay pasa den un tratamento, pero si esey no bay bon, e mucha tin di haya un transplante di medula. E ta haci un yamada humanitario pa su yiu. El a splica cu si Salome tabatin AZV, e lo por a haya yudansa na Hulanda. Den e caso aki nan no tin ningun seguro debi cu e tramite a tarda. El a cana caba tur su caminda, a haci test cu ne pero loke e ta pidi ta si por haya e yudansa di e mandatario pa finalisa cu su permiso y mesora esun di su yiu. E no ta kere cu awor aki, den e stress cu e enfermedad ta trece cu ne, cu e mester bay kibra cabes cu permisologia tambe.
E ta pidi yudansa, pero en caso cu si tin hende cu kier yud’e cu placa, por tuma contacto cu ne na celular 733-1258. Ramos a splica cu pa anochi e tin cu paga pa Salome ta den hospital.
