Dia 26 di december a tuma luga un maltrato severo banda dje tereno di waf den careda di 8:30 pm. A maltrata un turista di barco crucero despues di a mira un accidente.
Altocomisario drs. Ramon Arnhem a splica cu e turista tabata entregando e auto di huur despues cu el a pasa un dia agradabel cu su famia. A sosode un accidente cu e turista a presencia. Pero el a bay mira si tur cos tabata bon cu esunnan envolvi den e accidente. Na momento cu el a haci esey, esunnan den e auto a baha y ataca e turista severamente. E victima Canades a haya diferente fractura na su cara. Famia dje victima, casa y tres yiu muhe, a keda traumatisa cu loke a pasa.
Altocomisario a indica cu esey tabata e mal noticia. Cuerpo Policial Arubano (KPA) ta convivi cu e famia. Pero di otro banda, segun Arnhem, e bon noticia ta cu desde e incidente a tuma luga, KPA y Ministerio Publico a traha incansabel pa resolve e caso aki.
A detene un total di cuater persona, dos hende homber y dos hende muhe. Arnhem a gradici tur esunnan cu a traha duro pa por a logra e resultado aki.
El a enfatisa cu e actonan di violencia ta inaceptabel na Aruba. Esaki no ta pas na Aruba, ni contra local como turista. El a sigui indica cu Aruba ta conoci como ‘One Happy Island.’ Segun Arnhem, Aruba ta esun di mas sigur den region y kier keda asina. P’esey KPA lo haci tur posibel pa mantene asina.
Tur hende cu comete acto di violencia, polis lo detene nan. Nan lo ta presenta na corte pa responsabilisa nan pa nan actonan. E ta pidi pa no laga cos yega asina leu, violencia nunca ta e solucion.
