Diasabra atardi bou di entusiasmo grandi den un Joe Laveist Ballpark yena cu mayor y invitadonan, e federacion di baseball ABBA a inicia cu nan temporada di baseball 2017 – 2018. Mescos cu tur aña a inicia cu e ceremonia di desfile cu tur e ekiponan participante den e categoria infantil te cu esnan mas grandi cu ta AA. Despues di varios aña ABBA mes ta organisa nan campeonato di liga infantil, hubenil y grandi. E desfile tabata uno colorido cu hopi mucha presente, pa algun di nan e wega di baseball lo ta un experiencia nobo e aña aki.
Su Excelencia Minister di Deporte Dr. Alex Schwengle a hiba palabra unda su persona a boga pa mas union y traha hunto den baseball. Tur instancia di baseball mester por uni y yega na un entedimento pa nos peloteronan por disfruta di nan deporte sin obstaculo. Tambe e mandatario lo kier mira mas mucha riba veldnan di baseball. Presidente di ABBA, Sr. Sherwin Howell tambe a pone enfasis riba e trahamento hunto unda baseball mester bisa manera antes e tabata ta. E hecho cu ABBA a dedica e campeonato na e baluartenan Franklin Danies y Milton Croes mester sirbo como un estimulo pa tur cu ta traha cu alma y cuerpo pa e deporte. Lotto, e loteria di Aruba hunto cu su partnernan den deporte lo sigui contribui engrande cu e deporte di Aruba y sigur baseball cual ta un di e deportenan mas praktica y faborito na Aruba
Cumprando weganan di Lotto, e Loteria di Aruba manera Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega, Mega Plus y weganan di Raspa bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
