Dialuna mainta Minister di Turismo y Salud Publico Dangui Oduber a duna un conferencia di prensa na Palm Beach caminda e mandatrio a anuncia cu lo drecha e toren y plataforma na Palm Beach. Manera otro proyecto cu ta andando rond di nos isla, esaki tambe ta un proyecto cu den cuadro di embeyecimento y mehoracion di producto Aruba. Esaki t’e toren cu ta situa net dilanti di Riu Antillas Hotel masha bishita pa nos turista y localnan.
Minister Oduber a recorda pueblo cu ya caba na aña 2018 a drecha esaki un biaha, cual a realisa en conhunto cu Riu Hotel cu a pone mita di e fondo cu tabata necesario e tempo ey. Lamentabelmente e trabounan cu a haci pa drecha e toren e tempo ey no a dura mucho. Door di mal tempo y e actonan di naturalesa un biaha mas e toren ta den un mal estado y mester drecha. P’e motibo aki Ministerio di Turismo conhuntamente cu Aruba Tourism Authority a busca e fondonan necesario pa drecha e toren y plataforma aki. E biaha aki lo uza material cu lo bay tempo mas largo.
Den e proyecto aki ta bay construi un plataforma nobo den un estilo di octagon caminda na cada skina lo bay tin trapi. Lo acerca artista local cu lo mester haci un obra di arte bunita riba esaki. E proyecto aki ora e ta cla lo bira un otro atraccion pa nos turistanan caminda nan por saca potret y pone esaki riba nan medionan social cu sigur lo sirbi como mercadeo y promocion pa Aruba como destinacion. Sigur un otro bunita proyecto chikito pero cu tin un impacto grandi.
Turismo ta keda e driver di nos economia y p’esey ta sumamente importante pa nos keda inverti den producto Aruba. Minister Oduber ta sigui percura pa drecha y embeyece e diferente areanan turistico riba nos isla. Aruba ta di nos ban conserve.
