Durante conferencia di prensa dia 27 di februari 2023, Plataforma RAIZ a reafirma e principio di igualdad y a atende cu polemica di casacion.
Un di e principionan cardinal di RAIZ ta inclusion y derecho di igualdad. Ser humano mester ta garantisa cu nan lo ta respeta den nos comunidad. Gobierno y Parlamento tin e deber di introduci legislacion pa garantisa derecho di igualdad pa tur ciudadano, derecho di ser humano no ta tema pa referendum.
Alabes, RAIZ actualmente ta den un coalicion cual ta nifica cu ta gobernando cu un otro partido. Durante conseho di minister e mayoria a vota pro casacion, esey ta un echo cu nos mester respeta si nos ta respeta democracia.
Sinembargo, RAIZ ta keda para pa un sociedad inclusivo pa introduci derecho igual pa tur persona y RAIZ lo sigui enfoca riba e esfuersonan andando pa sigura esaki cual ta lo siguiente:
- Minister Geoffrey Wever ta den proceso pa disminui desigualdad pa medio di union civil, esta “geregistreerd partnerschap”, mirando cu e parehanan registra ainda no tin e mesun derecho como esunnan casa e.o. pensioen, siguridad social.
- Ley di matrimonio di mesun sexo di cual RAIZ ta co-firmante. Como co-firmante di e ley, Parlamentario Misha Raymond ta hibando e bataya pa igualdad den seno di Parlamento. E ley di iniciativa lo ta trata den Parlamento alrededor di mei 2023 prome cu e bay den casacion.
Un sociedad inclusivo ta un sociedad cu ta para pa derecho igual y e lucha aki no ta di RAIZ so, e ta di nos como un comunidad progresivo cu ta para pa derecho humano. RAIZ ta encurasha comunidad di Aruba pa acerca e miembronan di Parlamento pa sigura cu e ley pasa y pa asina nos introduci un igualdad na Aruba den e mas amplio sentido.
