Leonardo Figaroa ta lider di Partido Direccion Politiea (PDP), kende durante un entrevista recientemente a sali y vocifera su preocupacion pa cu e maneho di Minister-President, mr. Evelyn Wever-Croes su maneho den Directie Infrastructuur en Planning (DIP). Ta riba 15 di november ultimo el a tuma nota di un declaracion di prome minister. Ey Figaroa a nota cu e prome mandatario a declara cu el a “depolitisa DIP”.
Figaroa ta sinti cu esaki no completamente ta berdad. Wever-Croes lo a duna un mandato na e director interino di DIP pa ehecuta e maneho. E lider politico hoben ta sinti cu sea e prome mandatario ta gañando e pueblo of e ta neglisha su responsabilidad como e minister encarga cu infrastructura.
Parce, prome minister a laga Centrale Accountantdienst (CAD) haci un investigacion riba e decreto ministerial cu el a firma pa duna DIP e mandato pa ehecuta maneho, pues pa evita cu decisionnan, e minister tin cu tuma. PDP a manda un LOB-verzoek cu shete punto p’asina haya sa e motibo real dicon e prome mandatario a cambia su decreto ministerial. Pues, realmente e no a depolitisa DIP manera e ta bisa, e ta djis un mandato, e minister por yega na DIP y firma cualkier documento como e mandatario encarga. Segun por a mira riba e website di gobierno, ainda e leynan pa DIP ta mesun cos y nada a cambia. Compara cu Minister Geoffrey Wever, e si a cambia e leynan necesario y awo tur decreto ministerial pa entre otro habri un negoshi ta bay via Departamento di Asuntonan Economico y no tin ningun influencia of mandato di e minister.
