Leah Lejuez tin apenas 11 aña y ya caba el a participa den un careda internacional. Esta na Miami su Tropical 5 KM y a gana e prome premio den e categoria femenino di 14 aña of menos. Cu orguyo el a mustra e medaya cu el a ricibi na final di e careda.
Den fin di siman cu ta tras di lomba a tuma luga e Tropical 5 KM Run. Un di e participantenan ta e hoben atleta Leah Lejuez di solamente 11 aña. Na final por a scucha e hendenan cu a compañ’e ta grita “Pusha Lean, ban Leah”. Un orguyo grandi por a sinti e momento ey.
Den e publico tabata Mark-Benson Denz, di 24ora.com, kende a bin ta sigui tur e participantenan di Aruba di cerca. El a logra core e distancia di 5 kilometer den 26:34. E experencia di e competencia aki tabata hopi bon pa e hoben, kende a cuminsa train cu su 7 aña caba.
Prome e tabata por a participa den e categorianan di 1 of 2 kilometer door di su edad. Pero despues cu el a pasa 10 aña, e por a cuminsa registra su mes den 5 kilometer di hobennan. El a haya interes despues di a mira su tata a participa den diferente Marathon di Miami, pa e tambe participa.
No solamente el a kibra su record personal, pero ta prome biaha cu e ta ocupa e prome puesto den un careda, den su categoria.
E tin cu warda algun aña mas prome cu e por dal e stap pa half marathon y djey den e marathon. “Mi kier a gradici mi coach Michael, Jonathan y mi mayornan cu a yuda mi hopi.”
