For di empleadonan di WEB Aruba N.V. mes nos ta hayando señal cu locual Utilities Aruba N.V. y minister presidente mr. Evelyn Wever-Croes a splica na publico no ta cuadra cu berdad. E hustificacion pa e minister politicamente responsabel nombra su mesun sua (ruman di su casa), Serapio “Laty” Wever di 70 aña di edad, como president-commissaris y awor como director temporal na WEB a cay den masha mal tera. Ningun hende ta di acuerdo cu e nepotismo aki!
Den nan afan pa defende e nombracion aki, a splica cu statutonan di WEB ta indica cu na momento cu kita ambos director pareu fo’i trabou, manera den e caso aki cu e golden handshake mas pisa di e ultimo decada aki, anto cu presidente di e hunta di supervision mester asumi e rol ey. Pero, conocedonan di e statutonan a manda esaki pa nos pa confirma cu esey NO ta berdad!
Den e caso specifico aki, Utilities Aruba N.V. a opta pa nombra e president-commissaris di WEB Aruba N.V. como e director temporal. No solamente Laty Wever, sino a nombra un otro miembro di directiva tambe den gerencia di WEB awo. Mester menciona cu den WEB nan ta teme cu e directornan temporal aki lo bin pa tuma e decisionnan cu e directornan saliente no kier a tuma, debi cu nan ta contra bienestar di e compania. Door di pone un famia cu no conoce nada den WEB, e chens pa tuma decision asina ta masha grandi.
Fuentenan ta indica cu e compania Eagle LNG a tene diferente reunionnan cu Hunta di Supervision di WEB, sin e directornan presente, den sala di reunion di bufete di abogadonan Croes, Wever & Ruiz, di e tata di minister-president. Pues den e discusion aki, unda Eagle LNG kier bin cu un proyecto balora na 1.5 biyon dollar riba tereno di refineria, no por haya fiansa pa e proyecto aki tanten cu e no tin un contract fiho pa suministra WEB cu gas. Pues, e decision pa firma cu Eagle LNG tin un balor biyonario y consecuentemente no ta worry mes si mester a gasta algun miyon pa core cu e directornan cu tabata stroba e “deal”.
Pa colmo, ta sospecha cu Utilities Aruba a nombra e director temporal aki, locual ta contra ley. Di acuerdo cu statutonan di WEB, ta e mesun Hunta di Supervision di WEB ta nombra e director temporal na momento cu no tin director mas na mando. Pues, pa e decision tabata legal, Laty Wever mester a nombra su mes den e posicion. Pero probablemente el a sinti cu esey no ta zona un decision integro y a opta pa laga Richard Eman tum’e for di Utilities Aruba, pero locual precisamente ta haci e decision ilegal awo.
