Riba diadomingo 26 januari Federacion Aquatico Aruba, AAF (Antes Arubaanse Zwembond, AZB) ta organisa un careda di Awa Habri (Open Water) den lama di Nikki Beach (banda Aquasplash) na Playa.
Nan por landa 1, 3 of 5 km y nan por gana medaya pa prome 3 luganan den edad y distancia. Si tin tempo ainda, nan por landa un estafette di 3 landado.
E comision tecnico di AAF a organisa foi’ aña pasa caredanan oficial den lama pa Aruba por competi riba un nivel internacional. E meta grandi di TC ta, participacion di landadonan Arubano na Wega Olimpico 2024. “Tin hopi talento na Aruba” segun Louella Maduro, “Aña pasa nos a haya 431 landado den 5 careda cu nos a organisa of yuda organisa. Tur cos a bay bon, pasobra nos ta haci tur cos segun reglanan di FINA. Ambulance, doctor y boto/kayak di rescata semper ta presente”.
Registracion y control medico ta cuminsa 6:30 di mainta y careda di 5 y 3 km ta cuminsa pa 8’or di mainta. E careda di 1 km ta cuminsa 9:45 AM. Y estafette (si tempo ta laga) ta pa 11’or di mainta. Inscripcion ta 25 florin y mester manda email pa [email protected] prome cu 24 januari pa 10’or di mainta.
