Diabierna mainta Corte a trata e caso penal di un di e acusadonan den e caso grandi di estafa cometi contra Aruba Bank, unda cu haciendo uzo di un carchi ATM a lanta casi 300 mil florin di un cuenta di banco. Den e caso aki tin dos persona deteni, e Dominicano Joselito Batista y e Bulgaro Biser Venkov Videnov, mientras cu e di tres persona ta desconoci.
Abogado defensor, Mr. Chris Lejuez a pidi pa pospone e caso di su cliente Dominicano ya cu e kier duna un declaracion nobo y apenas tres dia prome el a haya e procesverbaal completo. Lejuez a reclama cu for di juni / juli el a pidi pa Recherche tuma interogacion di su cliente, pero esaki no a sosode ainda.
E Giscal mes no por a splica di con e no a tuma luga, pasobra e caso tabata di un Fiscal cu no ta na Aruba mas. Finalmente a dicidi di pospone esaki, pero e Bulgaro si tabata desea pa su caso sigui.
E ta admiti su rol, pero ta bisa cu el a wordo aserca door di e Dominicano y un otro homber mas. Y ta solamente un dia el a haci esaki, cu ta riba e anochi di 26 pa 27 di maart. El a bisa cu nan a pasa na 4 bancomatico y na cada un a saca placa 3 pa 4 biaha sin cu esaki a wordo detecta. Esaki pasobra a uza un carchi original cu su pincode y e tabata pone su dede unda e placa ta sali. Di e forma aki loke ta wordo saca diferente biaha no ta wordo registra door di e mashin. Asina e anochi ey nan por a saca den 3 luga pariba di brug y uno na Tanki Leendert 68 mil florin.
A resulta cu e Bulgaro no ta un desconoci cu e tipo di delitonan aki. El a bisa cu na Bulgaria esaki ta manera algo cu hopi hende ta haci. El a yega di wordo condena eynan caba pa esey, tambe na Macau (China) y awo na Aruba.
Cu e sistema aki ta prome biaha cu el a mira, p’esey el a participa, pasobra placa mes e no a haya. Solamente el a haya un 10 mil florin pero esey tabata pa e un poco mas di 5 mil dollar cu el a presta e Dominicano den luna di januari.
Pa Ministerio Publico ta proba, segun e Fiscal, cu haciendo uzo di un carchi falso riba e anochi di 26 pa 27 di maart, el a saca placa for di bancomatico sin cu e tabatin derecho riba dje. Como cu e no ta un first offender, a pidi un castigo di 18 luna, mas 50 mil florin pa daño y 68 mil florin pa loke el a saca di e mashinnan. Si e no a haci e pagonan, e lo mester sinta mas castigo.
Dia 30 di november Corte lo anuncia decision den e caso aki.
