Nada na mundo no por supera e poder di oracion. Na prome luga, hopi hende ta kere den placa, pero ora nan tin dolor of preocupacion, nan ta pidi oracion pasobra tur momento ta keda proba cu kende mester di Dios.
Tin hende ta desea poder y nan ta haci tur locual ta posibel pa yega na poder, pero ora situacion ta dificil, nan poder no por yuda nan y nan ta pidi oracion. Pasobra locual cu nan a confia den dje ta algo temporal y ta solamente cu oracion nan por lanta ariba.
Ora un hende ta haci oracion y e ta yama henter su famia pa haci oracion, na e momento bo ta conoce ken e persona ta den realidad. Pasobra pa abo como mayor yama henter bo famia den oracion, bo mester ta humilde, responsabel sincero y aki nan bo yuinan lo mira ken berdaderamente mami y papi ta y cu nan ta reconoce cu nan tin mester di Dios. Y ora e mayornan ta reconoce Dios, Dios ta yuda e famia.
Si bo ta den un posicion, miembro di cierto grupo, trabou of organisacion den cual bo no por halsa e nomber di nos Señor Hesus Cristo abiertamente, anto ta yega e momento pa bo scohe sea pa Dios of pa hende (Lucas capitulo 16 vers 13).
Pasobra a yega tempo pa nos por tuma e decision di no ta solamente conocedo di Dios pa nomber, pero nos tin di bira sirbido di Dios.
Si den bo bida un puesto tabata ofrece na bo di hopi placa y responsabilidad, den cual durante trabou bo no por menciona ni alaba e Dios cu bo ta sirbi, tene cuenta cu e posicion ey no ta bini di Dios. Dios no ta duna algo cu ta apartabo for di Dios.
Den e buki di Daniel Capitulo 6 Daniel vers 1-28 Rey Dario a instala tres gobernador den e pais, di cual Daniel tabata uno y Daniel tabata asina sabi cu e rey kier a hacie hefe riba tur.
Su coleganan a cuminsa envidi’e y a busca tur forma pa wak si e ta integro y nan no por a haya nada cu por a daña su nomber.
Y mesora nan a constata cu e unico forma pa tumba Daniel tabata pa nan mete cu su bida di oracion na Dios (Daniel su posicion no a apart’e for di Dios).
Awel nos tur sa cu e asunto aki a hiba Daniel te den cueba di leon y Daniel a sali sin ningun rasca of lana di leon pega na su curpa.
Pa nada di mundo no laga ningun hende, ni maske nan por ofrece bo placa y posicion, stroba bo bida di oracion, alabansa y adoracion na Dios.
A yega tempo pa nos para firme pa Dios. Ta tempo pa haci oracion. Ta tempo pa e mundo sa ken Cristo ta den nos bida. Ningun amistad of posicion no tin mas balor cu bo bida di oracion na Dios.
Ta solamente Dios por yuda nos y saca nos for di e momentonan dificil aki, ora nos humilia mes den su presencia (2 Cronicas 7 vers 14+15).
Mayor cubri bo cas y henter bo famia bou di sanger di Hesus Cristo y E lo yuda nos.
Sinceramente,
Pastor Marcel Balootje.
