Un biaha mas a bin topa cu sushi den Oranjestad. A bin haya cantidad di sushi n’e ex-edificio di DOW. Algun siman atras a haci e area limpi, pero ta manera cu hende ta warda pa otro piki y pa nan bin tira mas sushi.
E sushi cu a bin topa cu ne ta di gran escala. Incluso tin cabuya pa colga paña. Esaki ta un mahos bista, pasobra otro banda di caminda tin e waf unda cu e barconan crucero ta yega. Miles di turista ta cana durante henter dia den e bisindario aki di Oranjestad.
Bureau City Inspector a manda hende pa asina nan kita e sushedadnan. E hendenan balente cu tin Aruba na curason a presenta, pa asina piki tur sushedad. Cuerpo Policial tambe tabata presente en caso cu tin adicto ambulante cu kier lanta contra e trahadonan aki, kendenan cu kier tene Aruba limpi.
Ta pidi instancianan concerni, manera gobierno, pa cera parti di e area aki cu ta habri. E adictonan ambulante a podera di e area aki. A topa cu stoel, tent cu corchon unda adicto ambulante ta drumi den e area turistico.
