Kerki Protestant e aña aki ta recorda 200 aña di su fundacion, cu e yegada di e Hulandesnan na Aruba y na comienso e tabata manera un misa di gobierno.
Tabata un grupo grandi di creyente cu, hunto cu Gobierno di e tempo ey, cu a bin cu e idea di bin c’un misa. Pastoor Jan Rinzema a splica cu e tereno, situa den centro di Oranjestad, unda cu a construi e prome kerki protestant, ta tereno cu ta pertenece na famia Arends. Pero ora cu e misa a sigui crece mas y mas, e no tabata solamente un misa, pero tambe educacion. E comunidad protestant tambe cuminsa cu educacion organisa riba nos isla.
Awendia e comunidad protestant tin 4 locacion y ta duna sirbishi den tres diferente idioma: Papiamento, Ingles y Hulandes. Por bisa, cu e ta un berdadero misa di integracion, manera cu tabata Hesus su intencion.
CELEBRACION 200 AÑA
Diasabra, 10 di december proximo, Kerki Protestant lo tene un anochi di exposicion, unda cu, pa medio di e potretnan lo mustra e edificionan di kerki protestant di 1900, saca for di un buki special di Koninklijk Archief Den Haag. Ta trata di potretnan di calidad halto cu ta duna un muestra di e bida di e tempo nan ey. Pero tambe lo tin e storia di Leon bereños, cu lo conta di e famianan fundado di misa protestant na Aruba y tambe lo tin Ben Schelling cu lo conta di e historia di e edificionan den cual a cuminsa cu misa protestant na Aruba.
Reverendo Peter Hazenoot a bisa cu por sigui padilanti, pasobra cu e mensahe nunca a cambia. A pasa mas di dos mil aña y e mensahe a keda mescos. Señor nos Dios nunca a cambia, nos sa cu Dios su amor pa nos ta incondicional, cu E semper lo t’ey pa nos. E no lo bandona nos, pero lo t’ey cu nos te na fin di mundo.
KERKI PROTESTANT
Construccion di e Kerki Protestant na Oranjestad a tuma luga entre 1845 pa 1846 pa e congregacion protestant na Aruba, funda na 1822. E ta construi den un estilo di construccion artesanal-tradicional, e kerki ta independiente y ta situa n’e skina zuidoost di un percela amplio delimita pa Wilhelminastraat, Schoolstraat, Rifstraat y Klipstraat. E fachada sur, cu su porche y su entrada principal, ta situa na Wilhelminastraat 1.
E edificio antiguo den cual e kerki tabata situa, actualmente t’esun mas antiguo na Aruba, cumpra pa 250 florin for di famia Arends. E cas, cumpra for di famia Arends, despues a fungi como cas y leslokaal di e iglesia. A celebra e prome sirbishi dia 25 di augustus 1822.
